Нерюнгри оройуонугар доруобуйа харыстабылын өссө үс бөдөҥ эбийиэгин биир миллиард солкуобайтан тахса үбү көрөн, 2023-2024 сылларга саҥалыы уларытан тутуохтара. Бу туһунан Ил Дархан Айсен Николаев бүгүн, олунньу 10 күнүгэр, быһа эпиир кэмигэр кэпсээтэ. Итиэннэ оройуоҥҥа доруобуйа харыстабылын сайыннарыыга онтон да атын былааннар тустарынан кэпсээтэ диэн, СИА иһитиннэрэр.
Ил Дархан Айсен Николаев көҕүлээһининэн оҥоһуллубут «Нерюнгри оройуонугар доруобуйа харыстабылын эйгэтин сайыннарыы Стратегиятын» түһүмэхтэрин олоххо киллэрии үлэтэ бара турар. «Нерюнгри оройуонун олохтоохторун ордук долгутар биир саамай кыһалҕалаах боппуруостарынан доруобуйа харыстабыла буолар диэн уруккуттан этэр этим. Биллэн турар, бу сылларга балачча үлэ ыытылынна. Ол курдук оҕо поликлиниката олоччу саҥалыы уларытан тутулунна, мэдиссиинэ ыарахан сыаналаах улахан тэриллэрэ атыылаһыллан туруоруллубута, уһулуччу кыахтаах элбэх саҥа тэриллэр баар буоллулар. Үс-түөрт сыллааҕыта кыайан быһаарыллыбат диэн ааттанар кыһалҕалар күн бүгүн быһаарыллан тураллар. Ол гынан баран, доруобуйа харыстабылыгар барыта үчүгэй диир эрдэ. Ону ааһан, өрөспүүбүлүкэ бырабыыталыстыбата оройуон мэдиссиинэтигэр баар боппуруостары быһаарыытыгар бытаарыыны таһаарара астыннарбат. Ол иһин билигин кылгас кэм иһигэр хаачыстыба уонна көрдөрүү өттүгэр күүстээх өрө хамсаныыны оҥорор сорук туруорулунна», — диэтэ Ил Дархан.
Оройуоҥҥа доруобуйа харыстабылын сайыннарыы уонна үбүлээһин боппуруостара дойду Бэрэсидьиэнин Уһук Илиҥҥэ Бастайааннай бэрэстэбиитэлин Юрий Трутневы уонна РФ Уһук Илини, Аартыканы сайыннарыыга миниистирэ Олег Чекунковы кытта хаста да дьүүллэһиллибитэ.
Ол курдук, ааспыт сылга Нерюнгри оройуонугар доруобуйа харыстабылын өссө үс бөдөҥ эбийиэгин 2023-2024 сылларга саҥалыы уларытан тутар туһунан быһаарыы ылыллыбыта: «Б» балыыһа комплексыгар дьахтар консультациятын дьиэтин, тирии-венерология диспансерын уонна эмтиир корпуһу. Ити сыалга биир миллиард солкуобайтан тахса үп көрүлүннэ.
«Биһиги манан тохтоон хаалыа суохтаахпыт. Чугастааҕы сылларга доруобуйа харыстабылын өссө 11 эбийиэгин хапытаалынай өрөмүөннэрин ыытар соругу туруордум. Оройуон киин балыыһатын бары сүрүн дьиэлэригэр хапытаалынай өрөмүөн барыахтаах, ити дьиэлэр толору үлэлииллэрин хааччыйар ситимнэр саҥаҕа уларытыллыахтаахтар,
2024 сыл бүтүүтүгэр оройуоҥҥа аныгы ирдэбиллэргэ толору эппиэттиир доруобуйа харыстабыла баар буолуохтаах. Ити былааннары олоххо киллэриигэ 2,5 миллиард солкуобайтан итэҕэһэ суох эбии үбүлээһин ирдэнэр. Федеральнай бырабыыталыстыба өйөбүлүнэн бу сорук быһаарыллыаҕар улаханнык эрэнэбит», — диэн Айсен Николаев бу боппуруоһу түмүктээтэ.
Судаарыстыбаннай Дуума дьокутаата Игорь Антропенко оскуолаларынан оҕолорго Сэбиэскэй кэминээҕи Саҥа дьыллааҕы остуоруйалары көрдөрөр туһунан этии…
Ас-үөл хаачыстыбатыгар уонна куттала суох буолуутугар Ил Дархан иһинэн координационнай сэбиэт мунньаҕар оскуолалары, уһуйааннары, социальнай…
Саха сиригэр дойду биир саамай бөдөҥ уонна технологическай өттүнэн уустук инфраструктурнай бырайыага – Өлүөнэ күргэтин…
Өрөспүүбүлүкэ борокуруора Сергей Дябкин сорудаҕынан, Ленскэй улууһун борокуратуурата Ленскэй куорат «Севернай» түөлбэҕэ хас да элбэх…
Саҥа дьыллааҕы бырааһынньыктары көрсө Судаарыстыбаннай Дуума дьокутаата Олег Леонов ТАСС-ка биэрбит кэпсэтиитигэр пиротехниканы куттала суох…
ИДьМ сулууспатын Ньурба улууһун отделын дьуһуурунай чааһыгар олохтоох киһи суотабай төлөпүөнүн уорбуттарын туһунан сайабылыанньа суруйбут.…