Нерюнгри оройуонугар — сэргэх күрэхтэһии

Муус устар 7 күнүгэр «Колмар» таас чоҕу хостуур хампаанньа кэрэ көстүүлээх сиргэ турар хайыһар базатыгар туристическай сүлүөтү тэрийэн, үлэһиттэри уонна Нерюнгри куорат олохтоохторун сэргэхситтилэр.

Манна сүлүөт ыытыллыахтаах түһүлгэтигэр боҕуруоскай от сыта ыраахха диэри тунуйда, хас биирдии киһи ыраастанан ааста. «Арктика» экспериментальнай оскуола үрдүкү кылааһын үөрэнээччилэрэ биһиги оҕо сааспытын санатар «белки и орешки» оонньуулларын үгүс дьон кэрэхсээн көрдө.

Оҕолор национальнай таҥастаахтара ону эбии киэргэттэ. Оскуола оҕолоро манна үөрэнэллэрин олус сөбүлээбиттэрин этэллэр. Сорохтор хайыы-үйэ идэлэрин талбыттар. Оҕолор олус көрдөөхтөр, настарыанньалара олус үчүгэй.
Сүлүөт күрэхтэһиитэ көрдөөхтүк-нардаахтык ааста. Көрөөччүлэр «денисовскайдар» ордуктар дуу «инаглинскайдар» бэртэр дуу, москвалар таһыччылар дуу диэн кимнээх кыайыахтарын таайыы бөҕө буоллулар.
Биир көхтөөх кыттааччы, «Денисовскайдааҕы» ГОК сүрүн инженер-сметчигэ Чин -Вин Евгения этэринэн, үлэһиттэр маннык күрэхтэһиилэргэ куруук көхтөөхтүк кытталлар, бу сырыыга икки дьахтар, түөрт эр киһи буолан кытта сылдьаллар. Манна бааллар электросилиэсэрдэр, тиэхиньикэҕэ куттал суох буолуутун инженерэ, электромэхээнньик уо.д.а. идэлээхтэр. Успуорт барыларын түмэр, биир кэлэктиип оҥорор. Евгения дьиэ кэргэнэ хайыһардыылларын,бассейнҥа сылдьалларын сөбүлүүллэр эбит. Онон хампаанньа үлэһиттэрэ дьиэ кэргэттэрин эмиэ успуортка уһуйаллар. Ол да иһин маннык күрэхтэһиилэр тэриллэн эрдэхтэрэ.