Нерюнгри оройуонугар ыксаллаах быһыы-майгы эрэсиимэ биллэрилиннэ

Ааспыт нэдиэлэҕэ Нерюнгри оройуонун ыксаллаах быһыыга-майгыга уонна баһаартан куттал суох буолуутун хааччыйар хамыыһыйа мунньаҕа буолан ааспыт. Тустаах мунньах түмүгүнэн улууска ыксаллаах быһыы-майгы эрэсиимин биллэрбиттэр.

Маннык быһаарыныы хамыыһыйа алтынньы 8 күнүнээҕи мунньаҕын боротуокуола туолуутун түмүгүнэн ылыммыттар. Хамыыһыйа чилиэннэрэ Нерюнгри куоракка, Серебрянай Бор, Чульман бөһүөлэктэргэ хаһаайына суох сылдьар ыт ахсаана көҕүрээбэтэҕин, оннунан хаалбытын бэлиэтээбиттэр. Ону таһынан, бөһүөлэктэр хаһаайына суох ыттары биирдиилээн тутуу уопсай балаһыанньаны тупсарыа суоҕун итиэннэ ыты тутар биригээдэ тиийбэтин ыйбыттар.

Онон сибээстээн, алтынньы 25 күнүттэн Нерюнгри оройуонугар ыксаллаах быһыы-майгы эрэсиимин биллэрбиттэр, кэккэ сорудахтары биэрбиттэр. Муус оннуттан дьэ хамсаан эрэр быһыылаах. Ити туһунан Нерюнгри оройуонун пресс-сулууспата иһитиннэрэр.