Нерюнгри участковайа Саха сирин чиэһин Бүтүн Арассыыйатааҕы куонкуруска көмүскүө

Нерюнгри оройуонуттан старшай участковай полиция боломуочунайа, старшай лейтенант Роман Морозов  «Народный участковый- 2024» куонкурус эрэгийиэннээҕи түһүмэҕин кыайыылааҕынан буолла.

Кини Саха сирин уонна ИДьМ Саха сиринээҕи салаатын чиэһин Бүтүн Арассыыйатааҕы куонкурус финалыгар көмүскүөҕэ, диэн ИДьМ пресс-сулууспата иһитиннэрдэ. Куонкурус иккис түһүмэҕэр Саха сирин араас оройуоннарыттан аҕыс участковай боломуочунайдара күрэхтэстилэр. Онлайн куоластааһын түмүгүнэн  327 куолаһынан Нерюнгри оройуонуттан Роман Морозов кыайыыны ситистэ.

«Народнай участковай- 2024» Бүтүн Арассыйатааҕы куонкурус финалыгар эрэгийиэннэр түһүмэхтэрин кыайыылаахтара кыттыыны ылыахтара. Куоластааһын бу сыл сэтинньи 1-10 күннэригэр ыытыллыаҕа.