Нерюнгри үбүлүөйүгэр анаан саҥа уопсастыбаннай миэстэни оҥороллор

Ил Дархан Айсен Николаев оробуочай сырыытын кэмигэр Нерюнгригэ Култуура пааркатын тутуутун хаамыытын кытта билистэ.

Уопсастыбаннай миэстэни тупсарыы куорат үбүлүөйүн көрсө түмүктүүр былааннаахтар. Бырайыак кыра куораттарга уонна устуоруйаҕа киирбит нэһилиэктэргэ куорат эйгэтин эбийиэктэрин ортолоругар ыытыллыбыт Бүтүн Арассыыйатааҕы куонкурус кыайыылааҕынан буолбута. Бырайыагы олоххо киллэрии 2024 сыллаахха саҕаламмыта, бу сыалга федеральнай бүддьүөттэн 150 мөл. солкуобай үп-харчы көрүллүбүтэ. Бүгүҥҥү туругунан  кафеҕа сылааһынан уонна уунан хааччыйар ситимнэри тардыы үлэтэ түмүктэннэ. Сайыҥҥы кэмҥэ уһуннук түспүт ардахтар биричиинэлэринэн кыраапыктан арыый хаалыы тахсыбыта бэлиэтэнэр. Онон сибээстээн бэдэрээтчит үлэ тэтимин түргэтэтэр уоннa болдьоҕу тутуһарга эбии үлэһиттэри тардар дьаһалы ылыммыта. Бары наадалаах матырыйааллар уонна кыра архитектурнай тутуулар аҕаллылыбыттар.

Айсен Николаев паарка сирин-уотун тас көстүүтүгэр үтүө уларыйыылар киирбиттэрин бэлиэтээтэ уонна саҥа уопсастыбаннай миэстэни оҥоруу үлэтин барытын болдьоҕор хаачыстыбалаахтык толорорго сорудахтаата. Паарка А.С. Пушкин аатынан Култуура уонна духуобунас киинин аттыгар турар. Ол иһин «Сибиир урбанистикатын лабораториятын» бырайыагы оҥорооччулар сүрүн тиэмэнэн култуураны талбыттар. Чуумпу искибиэр түһүлгэтэ баар пааматынньыктары уонна табыгастаах ыскаымыйалары учуоттаан оҥоһуллубут. Култуура уонна духуобунас киинин киириитигэр уоттаах-күөстээх арт-эбийиэктэринэн ситэриллибит улахан быыстапка түһүлгэтэ баар.

Киин сүрүн миэстэтэ —  «Чудное мгновение» диэн сылаас павильоннаах, кафелаах  аллея буолар. Аллеяны батыһа уоттаах-күөстээх паарка хачыаллара туруоруллубуттар. Сүрүн сырдатар сиринэн «Кинигэ» диэн ураты уоттаах-күөстээх арт-эбийиэк буолар. Аллея тэрээһиннэри ыытарга анаммыт сыаналаах уонна амфитеатрдаах болуоссатынан түмүктэнэр. Бетон кулуумбалардаах ыччат түһүлгэтэ ЗАГС киириитин утары турар уонна хаартыскаҕа түһэргэ анаммыт ураты беседканан, арканан ситэриллибит. Соҕуруу өттүгэр көхтөөх дьарыкка аналлаах икки былаһаакка баар: скейт-паарка уонна 7-14 саастаах оҕолорго анаммыт хачыаллардаах уонна успуорт элэмиэннэрдээх улахан оонньуур түһүлгэтэ.