Нерюнгрига уон этээстээх дьиэҕэ баһаар буолла

Сэтинньи 9 күнүгэр Нерюнгрига элбэх кыбартыыралаах уон этээстээх дьиэҕэ баһаар тахсыбытын туһунан иһитиннэрии баһаарынай быыһыыр сулууспаҕа киирбит. Бу туһунан СӨ ЫБММ пресс-сулууспата иһитиннэрбит.

Түөрт мүнүүтэ иһигэр быыһааччылар тиийэ охсубуттар. Кинилэр тиийиилэригэр ахсыс этээстэн буруо тахсар эбит. Дьиэттэн уопсайа 27 киһини таһаарбыттар.

Баһаар түмүгэр 15 кв.м. уокка былдьаммыт. Баһаарынайдар икки киһини быыһаабыттар.

Билиҥҥи туругунан, баһаар туохтан тахсыбыт биричиинэтэ уонна тахсыбыт хоромньу быһаарыллар. Баһаары умулларыыга Нерюнгритааҕы баһаарынай сулууспаттан 14 киһи, түөрт тиэхиньикэ  кыттыбыт.