Нерюнгрига бэрик биэрбит урбаанньыт көҥүлэ быһылынна

Нерюнгри борокуратуурата урбаанньыт бэрик биэриигэ холуобунай дьыалатыгар судаарыстыбаннай буруйдааһынын өйөөтө. Кини РФ ХК 4 ч. 291 ыст. (улахан суума кээмэйдээх бэрик биэрии) уонна РФ ХК 1 ч. 291.1 ыст. (бэрик биэриигэ кыттыыһыы) буруйданар.

Суут быһаарыытынан, буруйданааччы арыгы атыылааһынынан дьарыктанар эбит. 2021-2022 сс. үлэлиир кэмигэр Нерюнгри оройуонун ИДьМ полициятын начаалынньыгын солбуйааччытын кытта куомуннаспыт. Дуоһунастаах сирэй бэрэбиэркэ, рейдэ хаһан, хас чаастан ыытылларын туһунан буруйданааччыны биллэрэр эбит. Бэрик уопсай суумата 600 тыһ. солк. тэҥнэспит. Ону таһынан, сууттанааччы 2021 сыл күһүнүгэр атын урбаанньыкка көмөлөһөр сыалтан, дуоһунастаах киһиэхэ бэрик биэриигэ көмө оҥорбут.

Суут судаарыстыбаннай буруйдааччы этиитин учуоттаан, урбаанньыты 4 сыл 5 ыйга көҥүлүн быһарга, 8,5 мөл.солк. суумаҕа ыстараптыырга бириигэбэрдээтэ.

Холуобунай дьыаланы Саха сиринээҕи Силиэстийэлиир кэмитиэтин управлениета силиэстийэлээтэ. Суут бириигэбэрэ сокуоннай күүһүгэр киирэ илик, диэн СӨ Борокуратууратын пресс-сулууспата суруйар.