Нерюнгрига Дьахталлар консультациятын саҥардыллыбыт дьиэтэ үлэҕэ киириэҕэ

Нерюнгри оройуонугар оробуочай сырыытын чэрчитинэн, Ил Дархан Айсен Николаев Киин оройуоннааҕы балыыһа дьахталларын консультациятын дьиэтин саҥардыытын түмүгүн уонна «А» блогун өрөмүөнүн хаамыытын бэрэбиэркэлээтэ.

Бу үлэ Нерюнгри куорат агломерациятын 2030 сылга диэри комплекснай социальнай-экэнэмиичэскэй сайдыытын былаанын олоххо киллэриитин чэрчитинэн ыытыллар. Айсен Николаев эбийиэктэри көрүүтүн түмүгүнэн, Нерюнгритааҕы киин оройуоннааҕы балыыһа дьахталларын консультациятын бу ыйга үлэҕэ киллэрэргэ сорудахтаата. Ону таһынан эрэгийиэн салайааччыта быйыл «А» блок саҥардыытын болдьоҕор толору түмүктүүргэ сорук туруорда.

Дьахталлар консультациятын дьиэтин тутууга бэлэмэ – 100%. Эбийиэккэ инженернэй ситимнэри, лифтэлэри, вентиляцияны уларытыы, дьиэ иһинээҕи уонна тас өттүн саҥардыы, фасады ититии, түннүк уонна аан киириитин саҥардыы, хостору саҥаттан былааннааһын үлэлэрэ ыытылыннылар. Ону таһынан сыһыары тутар сирэ-уота тупсарылынна.

Эбийиэккэ саҥа мэдиссиинискэй тэрил уонна миэбэл атыыланан, дьиэ иһигэр туруорулунна. КОРБ кылаабынай бырааһа Зораб Саакян иһитиннэрбитинэн, СӨ Экэниэмикэҕэ сайдыытын кииннэрин социальнай сайдыыларын былаанынан балыыһа саҥа блоктарыгар 785 ахсааннаах тэрил уонна миэбэл атыылаһыллыбыт, ол иһигэр 8 мөлүйүөн солкуобайдаах наркоз аппараата. Бу  туһунан Ил Дарханын уонна Бырабыыталыстыбатын пресс-сулууспата иһитиннэрэр.