Нерюнгрига кыбартыыраттан электросамокаттары, гаас билиитэтин уонна канистраны уорбуттар

Нерюнгри оройуонун ИДьМ-тын отделын дьуһуурунай чааһыгар Нерюнгри куорат олохтооҕо тыллаабыт. Кини кыбартыыратын иһиттэн уопсайа 49 300 солкуобайдаах баайа-дуола уоруллубут.

Суһал-ирдэбил тэрээһиннэринэн холуобунай ирдэбил үлэһиттэрэ уорбаланааччы  быһаарбыттар. Хара санаалаах 31 саастаах, үлэтэ суох олохтоох киһи буолара биллибит.

Силиэстийэҕэ быһаарыллыбытынан, буруйу оҥорооччу эмсэҕэлээччини кытта биир дьиэҕэ олорор эбит. Кини кыбаартыыратыгар өрөмүөн үлэтэ бара турар буолан, киирэр ааны күлүүһүнэн хатыы сылдьыбыт. Быһылаан буолбут күнүгэр буруйу оҥорооччу арыгы иһэн итирик туруктаах сылдьыбыт уонна эмсэҕэлээччи кыбартыыратыгар, урут онно олоро сылдьыбыт буолан, бэйэтин маллара хаалбыттарын-суохтарын бэрэбиэркэлии киирэргэ быһаарыммыт. Күлүүһүнэн арыйан, уорбаланааччы кыбартыыраҕа киирбит.

Ол сылдьан бэйэтин малларын булбакка, атын киһи малын ыларга быһаарыммыт. Аан бастаан буруйу оҥорооччу гаас билиитэни, тимир канистраны уоран, иккис этээскэ олорор доҕорун кыбартыыратыгар илдьибит. Онтон электросамокаттары уорбут уонна салгыы арыгылаабыт. Билиҥҥи кэмҥэ уоруллубут мал былдьанна. РФ Холуобунай кодексатын 158-с ыстатыйатын 3-с чааһынан («Уоруу») холуобунай дьыала тэрилиннэ, диэн Нерюнгри оройуонун ИДьМ отдела суруйар.