Нерюнгрига офтальмология балыыһатын салаата аһылынна

Бүгүн, атырдьах ыйын 30 күнүгэр, офтальмология өрөспүүбүлүкэтээҕи балыыһатын салаата – офтальмология Соҕуруу Саха сиринээҕи киинэ аһылынна.

Ил Дархан Айсен Николаев Саха сирин соҕуруу өттүгэр маннык эбийиэк аһыллыыта мэдиссиинэ өҥөлөрө табыгастаах уонна хаачыстыбалаах буолалларын үрдэтэргэ биллэр хардыынан буоларын бэлиэтээтэ.
Билигин олохтоохтор офтальмология көмөтүн бэйэлэрин куораттарыттан уонна өрөспүүбүлүкэттэн барбакка эрэ, миэстэтигэр ылыахтара.
«Чоҕу хостооччулар идэлээх бырааһынньыктарын, Шахтер күнүн көрсө биһиги үлэҕэ ситиһиилэри эрэ бэлиэтээбэппит, ону сэргэ шахтердарга уонна Нерюнгри, Соҕуруу Саха сирин олохтоохторугар наадалаах эбийиэктэри үлэҕэ киллэрэбит. Манна эбийиэги саҥардыы кэнниттэн офтальмология салаата баар буоларыгар бииргэ үлэлээбит офтальмология өрөспүүбүлүкэтээҕи балыыһатын кылаабынай бырааһа Иван Петрович Луцкаҥҥа уонна улуус балыһыга Роман Михайлович Щегельнякка ис сүрэхтэн махтаныахпын баҕарабын. Бу үчүгэй ситиһии. Нерюнгри олохтоохторо доруобуйаларын көрдөрөллөрүгэр куорат уонна өрөспүүбүлүкэ таһыгар барарга тиийэллэрэ, оттон билигин өҥөлөрү субу манна, дьиэлэригэр оҥорторуохтарын сөп. Дойду бэрэсидьиэнэ Владимир Путин уонна Уһук Илиҥҥэ боломуочуйалаах бэрэстэбиитэл Юрий Петрович Трутнев ыллыктаах быһаарыыларынан, кэнники сылларга Нерюнгри улууһугар доруобуйа харыстабылын бөҕөргөтүүгэ элбэҕи оҥоробут», – диэтэ Ил Дархан.
Айсен Николаев офтальмология өрөспүүбүлүкэтээҕи килиниичэскэй балыыһатын кэлэктиибигэр өр сыллаах үтүө суобастаах үлэтин иһин өрөспүүбүлүкэ баһылыгын Махталын туттарда.
Нерюнгри улууһун баһылыга Роман Щегельняк эппитинэн,  соторутааҥҥа диэри олохтоохтору долгуппут салаа билигин иннин диэки тэтимнээхтик сайдар. Ол туоһутунан нэһилиэнньэҕэ хаачыстыбалаах көмөнү оҥорор доруобуйа харыстабылын үрдүк технологиялаах эбийиэктэрэ буолаллар.
300-тэн тахса кв.м. иэннээх, мэдиссииинэ тэриллэринэн толору сэбилэммит дьиэҕэ таһыттан уонна балыыһаҕа сытан эмтэнэргэ усулуобуйа оҥоһуллуоҕа. Ону сэргэ теле-мэдиссиинэнэн сүбэ-ама биэрии тэриллиэҕэ.

«Нерюнгри улууһун баһылыга Роман Щегельняк дьиэни булан биэрэргэ көмөлөстө. Офтальмология киинин тэрийиини Айсен Николаев өйөөтө. Өрөспүүбүлүкэҕэ доруобуйа харыстабылыгар үлэлиир бырагыраамалар көмөлөрүнэн биһиги сулууспаларбытыгар мэдиссиинэ үрдүк технологиялаах тэриллэрин атыылаһабыт. Лазернай эпэрээссийэлэргэ исписэлиистэри үөрэттибит. Кииҥҥэ түөрт офтальмолог-быраас Алдан уонна Нерюнгри улуустарын Оройуоннааҕы киин балыыһалара ыыппыт ыарыһахтарын көрүөҕэ-истиэҕэ. Бастакы көмөнү Оройуоннааҕы киин балыыһа оҥоруоҕа, оттон уустук түбэлтэлэргэ уонна эпэрээссийэлэргэ саҥа Кииҥҥэ ыытыахтара. Эпэрээссийэлэр Мэдиссиинэ булгуччулаах страховкатын полиһынан босхо оҥоһуллаллар», – диэн Офтальмология өрөспүүбүлүкэтээҕи балыыһатын кылаабынай бырааһа Иван Луцкан санаатын үллэһиннэ.

СӨ Ил Дарханын уонна бырабыыталыстыбатын пресс-сулууспата