Нерюнгрига Олоҥхо ыһыаҕын эбийиэктэрин тутууну бэс ыйын 20 күнүгэр түмүктүөхтэрэ

Сергей Местников Нерюнгрига Олоҥхо ыһыаҕын тэрийэр кэмитиэтин көһө сылдьар мунньаҕар, тутуу үлэтин барытын бэлэмнэнэр бөлөхтөр кэлиилэригэр, бэс ыйын 20 күнүгэр диэри түмүктүүргэ сорудахтаата.

СӨ Бырабыыталыстыбатын Бэрэссэдээтэлин солбуйааччы тэрээһин буолар сүрүн былаһааккатын бары эбийиэктэригэр, «Амикан» этнографическай комплекска сырытта.

—Олоҥхо ыһыаҕар диэри биир ый хаалла. Өрөспүүбүлүкэ хамыыһыйата Нерюнгри оройуонун салалтатын кытта хардарыта сибээстээх улахан үлэни ыытта. Сыл анараа өттүгэр барыта кумааҕыга тиһиллибитэ, оттон бүгүн чыҥха атын хартыынаны көрөбүт. Кылаабынайа, ыһыах кэнниттэн манна дьон-сэргэ сынньанар сирдэрэ буолуоҕа, — диир Сергей Местников.

Култуура бырагырааматыгар, чуолаан, ыһыах аһыллыытыгар уонна сабыллыытыгар 1,5 тыһыынча киһи кыттыыны ылыа. Ол иһигэр тыйаатыр артыыстара, култуура уонна ускуустуба кыһатын устудьуоннара, өрөспүүбүлүкэ уус-уран кэлэктииптэрэ.

Ыһыах кыттыылаахтара оскуолаларга, футбол оскуолатын куорпуһугар, «Горизонт» санаторийга түһүөхтэрэ. Ону сэргэ, балааккалар куораттара былааннанар.

Олоҥхо ыһыаҕа Нерюнгрига от ыйын 4-5 күннэригэр ыытыллар. Барыта 70-тан тахса тэрээһин былааннанар, онно баар буолуохтара куонкурустар, спортивнай күрэхтэһиилэр.

Сиһилии: https://www.sakha.gov.ru/news/5891  манна көрүөххэ сөп.

СӨ Ил Дарханын уонна Бырабыыталыстыбатын пресс-сулууспата

Хаартыска: «Индустрия Севера» хаһыаттан