Нерюнгрига саҥа эрэгийиэннэр олохтоохторо быыбарга кытталлар

Билигин дойду үрдүнэн 300-тэн тахса экстерриториальнай учаастак үлэлии турар. Бу Арассыыйа саҥа эрэгийиэннэрин олохтоохторо быыбарга кытталларын туһугар оҥоһуллубута.

Саха сирэ Арассыыйа саҥа эрэгийиэннэрин олохтоохторугар гуманитарнай көмөнү ыытыыга үлэни  биир бастакынан саҕалаабыта. Өрөспүүбүлүкэбит Донецкай Кировскай куоратын бэйэтин эппиэтинэһигэр ылан, көмөнү ыытар. Оттон билигин куоластааһыны тэрийэр.

Нерюнгритааҕы быыбардыыр хамыыһыйа бэрэссэдээтэлэ Юлия Щегольдина:

— Биһиги экстерриториальнай учаастакпытыгар Луганскай, Донецкай өрөспүүбүлүкэлэр, Запорожскай,Херсонскай уобаластар олохтоохторо куоластаатылар. Бу эрэгийиэннэр сокуону таһаарар мунньахтарын дьокутааттарын таларга куоластарын биэрдилэр. Куоластааһын икки көрүҥүнэн ыытылынна — стационарнай уонна дьиэттэн.

Куоластааһыҥҥа кыттар туһуттан киһи тус докумуоннардаах буолуохтаах.

Луганскай норуодунай өрөспүүбүлүкэ олохтооҕо Иван Богоносюк куолаһын биэрдэ:

— Мин билигин Нерюнгрига баарбын. Гражданскай иэспин толорон куоластааһыҥҥа кытынным. Быыбар тэрийээччилэригэр махтанабын. Биир дойдулаахтарбын куоластыы кэлэргэ ыҥырабын.

Бу күннэргэ Нерюнгри оройуонугар куоластааһыҥҥа 2 тыһыынчаттан тахса киһи кытынна.