Нерюнгрига суол саахалыгар эчэйбит дьонтон биирдэстэрэ балыыһаттан таҕыста

2-с №-дээх Өрөспүүбүлүктээҕи балыыһаттан — Мэдиссиинискэй суһал көмө кииниттэн Нерюнгрига баахтабай оптуобус саахалыгар эчэйбит дьонтон биирдэстэрэ таҕыста. Быраастар Николай Бояркин доруобуйатын орто туруктаах диэн сыаналаатылар. Иккис  ыарыһах реанимацияҕа сытар диэн бүгүн биэдэмистибэ пресс-сулууспата иһитиннэрэр.

«Эчэйбит икки киһиттэн биирдэстэрэ орто туруктаах балыыһаттан таҕыста, иккис ыарыһах реанимацияҕа уонна интенсивнэй терапия салаатыгар эмтэнэ сытар. Кини туруга биир кэм ыарахан. Бүгүн өйүгэр кэллэ», — диэн сүрүн быраас Иван Иванов этэр.

Николай Бояркин Өлүөхүмэ улууһуттан сылдьар. «Денисовскай» ГОК-ка ахсыс сылын үлэлиир. Дьиэтигэр кэргэнэ, икки кыыс оҕото күүтэллэр.

«Мин саахал кэнниттэн бастакы кэми улаханнык өйдөөбөппүн. Иһим диэкинэн ыалдьарыттан өйдөммүтүм. Миигин бастаан Нерюнгритааҕы балыыһаҕа киллэрбиттэрэ, онтон санрейсинэн Суһал көмө киинигэр аҕалбыттара, — диэн Николай Бояркин пресс-сулууспаҕа иһитиннэрбит. — Миигин манна эмтээн атахпар туруордулар. Бүгүн дьоммор барабын. Быраастарга, сиэстэрэлэргэ олохпун быыһаабыттарыгар махтанабын!»

Хирург-быраас Саргылаана Софронеева этэринэн, Николай хирургическай салааҕа үгүс эчэйиилээх киирбит. Ыарыһахтары иккиэннэрин көмпүүтэр томограбынан чинчийбиттэр.