Нерюнгрига суут ирдэбилин толорботох дьаһалта исписэлииһэ ыстарааптанна

Нерюнгри куорат борокуратуурата Нерюнгри оройуонун биир муниципальнай тэриллиитин дьаһалтатын исписэлииһигэр сыһыаннаах дьыалаҕа судаарыстыбаннай буруйдааһынын өйөөтө.

Кини РФ Холуобунай кодексатын 315-с ыстатыйатын 2-с чааһынан (муниципальнай сулууспалаах сокуоннай күүһүгэр киирбит суут быһаарыытын толорору утарбыт) буруйданна. Бу туһунан СӨ Борокуратуурата иһитиннэрэр.

Суут быһаарбытынан, суут бириистэбэ сууттанааччыга хамнаһыттан иэһин тутарга уурааҕы ыыппыт. Сууттанааччы бу уурааҕы буостанан кэлбитин тус бэйэтэ тутан баран, дьаһалта салайааччыларыттан кистээбит. Салгыы, сулууспалыыр балаһыанньатынан туһанан, суут быһаарыытын толоруутуттан куотунар сыаллаах, бэйэтин хамнаһыттан иэс сууматын тутар ирдэбили толорботох. Суут, судаарыстыбаннай буруйдааччы этиитин учуоттаан, дьахтары 70 000 солк. суумаҕа ыстарааптаата. Суут бириигэбэрэ сокуоннай күүһүгэр киирэ илик.