Нерюнгрига оптуобус суулунна, киһини түҥнэри көттүлэр…

Ааспыт сууккаҕа өрөспүүбүлүкэҕэ буруйу оҥоруу биэс түбэлтэтэ тахсыбыта бэлиэтэннэ.

Бу туһунан Саха Өрөспүүбүлүкэтин Борокуратуурата иһитиннэрэр. Дьокуускай куоракка бэлэсипиэти уордулар. Ленскэй куорат олохтооҕуттан түөкүттэр «инвестицияҕа» киллэрэбит диэн албыннаан 1,4 мөл. солкуобай харчытын уордулар. Эмиэ Дьокуускай куоракка уонна Нерюнгрига сокуоннайа суох наркотигы эргинии эйгэтигэр буруйу оҥоруу бэлиэтэннэ.

Суукка иһигэр үс техногеннай баһаар умуруорулунна, өлбүт, эчэйбит киһи суох. Нерюнгри оройуонугар «Урал» ваахта оптуобуһун суоппара уруулун кыайан туппакка, суолтан төкүнүйдэ. Ол түмүгэр суоппар тута тыына быһынна, олорсон испит 9 киһи араас эт-хаан эчэйиитин ыланнар балыыһаҕа киирдилэр. Бу быһылаанынан бэрэбиэркэ барар.

Эмиэ Нерюнгрига «Тойота Марк 2» мааркалаах массыына суоппара светофора суох сатыы киһи туоруур сиригэр 1987 с.т. киһини түҥнэри көттө. Эчэйбит киһи балыыһаҕа киирдэ.