Байыастарга олунньу 23 күнүгэр анаан бэлэхтэри ыыттылар

Аҕа дойдуну көмүскээччилэр күннэригэр диэри биир нэдиэлэттэн эрэ ордук кэм хаалла. Дьокуускайтан байыаннай дьайыы зонатыгар сылдьар Саха сирин байыастарыгар үгэс буолбут бэлэхтэри  ыыттылар.

Бу туһунан СӨ Ил Дархана Айсен Николаев МАХ ханаалыгар иһитиннэрдэ. Бу сырыыга фроҥҥа уопсайа 15 туоннаттан тахса бырааһынньыктааҕы бэлэх ыытылынна. Саха сирин эр дьонугар олохтоох маннык астар киирдилэр: таба этэ, балык, халбаһы, балык миинэ, уулаах отон сироба уонна барыанньа.

«Биһиги байыастарбытын өйөөһүн — өрөспүүбүлүкэ бүтүн дьыалата уонна сүрүн сорукпут. Маннык үлэ тохтообот: өрөспүүбүлүкэ гуманитарнай көмөнү уонна наадалаах тэриллэри ыытар. Биһиги буойуттарбыт төрөөбүт дойдуларын өйөбүлүн билэллэрин туһугар салгыы үлэлиэхпит. Бары бииргэ — Кыайыыга!», – диэн Айсен Николаев бэлиэтээтэ.

Бэлэхтэр Саха сирин тирэх пууннарыгар тиэрдиллиэхтэрэ, онтон тирэх пуун үлэһиттэрэ байыаннай дьайыыга сылдьар буойуттарга инники күөҥҥэ туттарыахтара.

Байыаннай дьайыыны өйүүр үлэни «Бары бииргэ — Кыайыыга!» Өрөспүүбүлүкэтээҕи хамыыһыйа сүрүннүүр, эрэгийиэн салайааччыта Айсен Николаев салайар. Фроҥҥа көмө быһыытынан инники күөҥҥэ 2025 сылга эрэ сүүһүнэн тырааныспар, тыһыынчанан квадрокоптер, генератор, сибээс тэриллэрэ уонна атын тэриллэр тиэрдиллибиттэрэ. Саха сирин буойуттара эбии таҥаһынан-сабынан уонна тэрилинэн хааччыллаллар, биир дойдулаахтарыттан баһыылкалары туталлар.

«Байыаннай дьайыы зонатыгар мин уолаттары кытта элбэхтик көрсүбүтүм. Кинилэр өрүү төрөөбүт өрөспүүбүлүкэлэрин өйөбүлэ күүс-уох биэрэрин уонна санааларын көтөҕөрүн мэлдьи этэллэр», – диэн эрдэ Айсен Николаев Ил Түмэҥҥэ туһаайан этиитигэр иһитиннэрбитэ.

Тирэх пууннарга үлэһиттэр уонна волонтердар суукканы эргиччи үлэлииллэр. Кинилэр таһаҕаһы арыаллыыллар, хас биирдии буойуну өйүүллэр. Госпитальга сытар бааһырбыттарга көмөнү оҥоруу,  эмтэниилэрин тэрийиигэ, докумуоннарын оҥотторууга, аймахтарын кытта сибээстэһиигэ ураты болҕомто ууруллар.  Сиһилии: https://www.sakha.gov.ru/news/26265