Нерюнгригэ оҕолор сүһүрүүлэринэн силиэстийэ хаамыыта хонтуруолга ылылынна

Арассыыйа Сэлиэстийэлиир кэмитиэтин бэрэссэдээтэлэ Нерюнгри бассейныгар оҕолор сүһүрүүлэринэн сэлиэстийэлээһин хаамыытын тус хонтуруолугар ылла.

Арассыыйа Сэлиэстийэлиир кэмитиэтин Саха сиринээҕи Сэлиэстийэлиир управлениетынан сокуоннай сааһын туола илик оҕолор бассейҥҥа сөтүө сиэксийэтин кэнниттэн сүһүрбүттэринэн, РФ ХК 238 ыст. (куттала суох буолуу ирдэбиллэригэр эппиэттээбэт өҥөнү оҥоруу) холуобунай дьыала тэрилиннэ. Бу туһунан СӨ Сэлиэстийэлиир кэмитиэтэ иһитиннэрэр.
Силиэстийэ дааннайынан, уонтан тахса оҕо сөтүөлээн баран доруобуйаларын туруга мөлтөөбүтүнэн мэдиссиинэ үлэһиттэригэр көрдөрбүттэр. Быраастар оҕолору көрөн бараннар туруктара хлор дьайыытыттан мөлтөөбүтүн быһаарбыттар.
Билигин оҕолор туруктара кэминэн, балыыһаттан тахсыбыттар, олохторугар уонна доруобуйаларыгар куттал суоһаабат.
Арассыыйа Силиэстийэлиир кэмитиэтин бэрэссэдээтэлэ Александр Бастрыкин Саха сиринээҕи Сэлиэстийэлиир кэмитиэтин салайааччытыгар Виталий Кондратенкоҕа холуобунай дьыала силиэстийэтин хаамыытын уонна быһаарыллыбыт балаһыанньалары дакылааттыырга соруйда.

Маны эмиэ ааҕыахха сөп: https://sakha-sire.ru/neryungri-kuorakka-ogolor-syhyrdyler/