Нерюнгригэ Олоҥхо ыһыаҕын эбийиэктэрэ 85-90% бэлэмнэр

От ыйын 4-5 күннэригэр Нерюнгри куоракка ыытыллыахтаах Олоҥхо ыһыаҕын эбийиэктэрин тутуу тэтимнээхтик ыытыллар.

СӨ Бырабыыталыстыбатын Бэрэссэдээтэлин солбуйааччы Сергей Местников: «Сыл саҥатыгар бу «Таастаах» сири көрөрбүтүгэр барыта тыа, тыытыллыбатах ойуур этэ. Билигин кэлэн көрөн баран, сөҕүмэр тэтимнээх үлэ барар эбит» диэн сөҕө да, үөрэ да көрдүбүт», — диэн бэлиэтээтэ.

Сергей Местников тутуу эбийиэктэрин 85-90% бэлэм диэн түмүк оҥордо. Маны тэҥэ, эппиэттээх салайааччылар санааларын эмиэ үллэһиннилэр. Ол курдук, СӨ Култуура уонна духуобунас сайдыытын миниистирэ Афанасий Ноев тэтимнээх үлэ баран эрэрин, тустаах бэдэрээччиттэр бэйэлэрин үлэлэригэр эппиэттээхтик сыһыаннаһалларын бэлиэтээтэ.

Култуура управлениетын салайааччыта Туйаара Петрова Нерюнгри куорат «Саха аймах» уопсастыбаннай тэрилтэтэ уонна Иенграҕа олорор аҕыйах ахсааннаах омук дьоно Олоҥхо ыһыаҕар анаан турунан бэлэмнэнэн сылдьалларын кэпсээтэ. Хоту уонна аҕыйах ахсааннаах омуктар түһүлгэлэрэ «Амикан» этнографическай комплекска бэрт тупсаҕай көстүүлээх эбийиэк тутулла турар.

Ити курдук, Нерюнгри куоракка ыытыллаары турар Олоҥхо ыһыаҕын тутутуулара бэс ыйын 20 күнүгэр түмүктэнэн, олоххо киириэхтэрэ.