Нерюнгригэ уолун өлөрүүгэ уорбаланар аҕа тутулунна

Нерюнгри куоратыгар киһи өлүүлээх иэдээн таҕыста. Уорбаланааччынан  66 саастаах Нерюнгри олохтооҕо буолар. Кулун тутар 18 күнүгэр уорбаланааччы 41 саастаах уолун быһаҕынан охсубут.

Ол кэннэ суһал мэдиссиинэ  көмөтүн уонна полицияны ыҥырбыт. Мэдиссиинэ үлэһиттэрэ төһө да суһал көмөнү оҥоро сатаабыттарын үрдүнэн, эмсэҕэлээччи балыыһаҕа тиийэн өлбүт. Нерюнгри куоратын силиэстийэлиир управлениета  Арассыыйа Федерациятын холуобунай кодексатын 105 ыст (өлөрүү) диэнинэн холуобунай дьыала тэриллибит. Уорбаланааччы тутуллубут. Билиҥҥи туругунан холуобунай дьыала тула өлөрүү туохтан төрүөттэммитин быһаарар силиэстийэлиир үлэлэр ыытыллаллар.