Нерюнгрилар ыһыахха субуотунньуктаатылар

Ыһыах күн Нерюнгри олохтоохторо, тэрилтэлэр Таастаахха түмүстүлэр. Бу Олоҥхо ыһыаҕын көрсө сирдэрин-уоттарын ыраастаары, бэрээдэктээри, өрө көтөҕөөрү.

Бу туһунан улуус дьаһалтатын пресс-сулууспата суруйар. Субуотунньугу оройуонун дьаһалтата тэрийбит. Мустубут дьон-сэргэ суолу-ииһи, тыа саҕатын ыраастаабыттар, ыһыахха сиэр-туом ыытыллар сири-уотун тупсарбыттар.

Маннык күргүөмүнэн түмсэн үлэлээһин, дьон-сэргэ  далааһыннаах тэрээһин үрдүк таһымнаахтык ыытылларыгар баҕарарын, эппиэтинэстээхтик сыһыаннаһалларын көрдөрөр диэн олохтоох дьаһалта бэлиэтээн суруйар.