Нигерия олохтооҕо Саха сиригэр сууттанан, сэттэ сылга көҥүлэ быһылынна

Саха Өрөспүүбүлүкэтин Үрдүкү суута Нигерия Өрөспүүбүлүкэтин 24 саастаах олохтооҕун бириигэбэрин көрдө. Кинини Ленскэй оройуоннааҕы суута РФ ХК 159 ыст. 4 ч. буруйдааҕынан билинэн, уон сылга көҥүлүн быһарга уураахтаабыта диэн СӨ Сууттарын пресс-сулууспата иһитиннэрэр.

Силиэстийэ кэмигэр быһаарыллыбытынан, Нигерия олохтооҕо 2022 сыл кулун тутарыгар Арассыыйаҕа кэлэн, Калужскай уобаласка регистрацияламмыт уонна үөрэххэ киирбит. Суут бастакы инстанцията быһаарбытынан, эр киһи РФ территориятыгар сылдьан, тэрээһинээх буруйу оҥорон бөлөххө киирбит. Кинилэр гражданнары интэриниэт нөҥүө албыннаан, харчы суйдааһынынан дьарыктаммыттар. Эмсэҕэлээччилэри кытта кэпсэтэн, чугасыһаллар, эрэлгэ киирэллэр, доҕордоһоллор эбит.

Нигериец дьахталлары кытта социальнай ситимҥэ билсэн, американскай кореецпын, Турцияҕа олорор сингапурецпын, Великобриятанияҕа олорор полякпын диэн билсибит. Сорохторго тапталга билиммит, көһөн кэлиэх, косметика атыылаһалларыгар көмөлөһүөх буолбут. Оннук курдук албыннаан, дьахталлартан барыта холбоон 9,1 мөл.солк. уорбут.

СӨ Үрдүкү суутун холуобунай коллегията дьыала матырыйаалларын көрөн баран, сууттанааччы буруйун үс түһүмэҕинэн  переквалификациялаабыт. Онон Нигерия олохтооҕо уопсай эрэсиимнээх холуонньаҕа сэттэ сыл көҥүлэ быһыллан, буруйун боруостуур буолбут. Бириигэбэр сокуоннай күүһүгэр киирбит.