Никита Андреев: «Пуорум түмүгүнэн дьон олоҕун тупсарар саҥа саҕалааһыннар баар буолуохтара диэн эрэнэбин»

Бу күннэргэ Москва куоракка «Төрүт дойду – Арассыыйа күүһэ» бүтүн Арассыыйатааҕы пуорум буола турар. Муниципальнай пуорумҥа барыта 7,5 тыһыынча олохтоох бэйэни салайыныы баһылыктара кытта сылдьаллар. Оттон Саха сириттэн 160 оройуон уонна нэһилиэк баһылыктара кытталлар.

«Биһиги Саха сирин 160-ча киһилээх дэлэгээссийэтин иһигэр киирэн «Төрүт дойду – Арассыыйа күүһэ» бүтүн Арассыыйатааҕы пуорумҥа кытта сылдьабыт. Бэҕэһээ ВДНХ-ҕа араас былаһааккаларынан семинардарга уонна пленарнай мунньахха сырыттыбыт. Эрэгийиэннэр бэйэлэрин ситиһиилэрин туһунан быыстапкаларын көрдүбүт. Live Arena диэн сиргэ кэлэммит дойдубут Бэрэсидьиэнэ Владимир Путины кытары көрүстүбүт. Кэлэр өттүгэр муниципалитеттар өттүлэриттэн хайдах үлэ барыахтааҕын сүбэлэстибит. Бу пуорум түмүгүнэн, улууспут дьонун олоҕун тупсарарга элбэх саҥа идеялар, саҕалааһыннар баар буолуохтара диэн эрэнэбин», — диэн Горнай улууһун баһылыга Никита Андреев санаатын үллэһиннэ.

Никита Андреев Хаҥалас улууһун Тиит-Арыы нэһилиэгин баһылыга Григорий Лукин «Судьба человека – гордость Отечества» анал номинация «Служение» Бүтүн Арассыыйатааҕы муниципальнай бириэмийэ лауреатын аатын ылбытыттан олус үөрбүтүн, долгуйбутун уонна киэн туттарын эттэ.