Никита Гаврилович Соломоновы кытта быраһаайдаһыы олунньу 14 күнүгэр буолар

Саха Өрөспүүбүлүкэтин Билимин академиятын дьиҥнээх чилиэнэ, Арассыыйатааҕы Наукалар академияларын чилиэн-кэрэспэдьиэнэ, Экология уонна олоххо-дьаһахха куттал суох буолуутун норуоттар икки ардыларынааҕы академиятын академига, бэрэпиэссэр, биология билимин дуоктара Никита Гаврилович Соломонов 2024 сыл олунньу 10 күнүгэр 95 сааһыгар олохтон туораата.

Никита Гаврилович Соломонов 1929 сыллаахха балаҕан ыйын 27 күнүгэр Саха АССР Хаҥалас улууһун 4-с Малдьаҕар нэһилиэгин Батамаайы Кытыла сэлиэнньэтигэр төрөөбүтэ.

1954 сыллаахха Саха судаарыстыбаннай педагогическай институтун айылҕа үөрэҕэ бакылтыатын бүтэрбитэ.

1954-1974 сылларга Саха судаарыстыбаннай университетыгар ассистентан саҕалаан зоология хаапыдыратын сэбиэдиссэйигэр уонна биология-география бакылтыатын деканыгар тииийэ үлэлээбитэ.

Никита Гаврилович Соломонов – аан дойду таһымнаах ааттаах-суоллаах учуонай, кыыл-сүөл биологиятын уонна экологиятын эйгэтин исписэлииһэ, үүтүнэн иитээччилэр экологиялара тарҕаныытын үөрэтиигэ сүҥкэн кылааттаах.

600-тэн тахса билим үлэ ааптара уонна хос ааптара буолар, ол иһигэр биология билимин уонна тулалыыр эйгэни харыстааһыҥҥа 13 монография уонна үөрэх босуобуйатын.

Гражданскай панихида 2024 сыл олунньу 14 күнүгэр Д.К. Сивцев-Суорун Омоллоон аатынан Опера уонна балет судаарыстыбаннай тыйаатырыгар 10:00-12:00 диэри буолар.