Никита Мординов: «Эһэбит аатын үйэтитэр дьоҥҥо махтанабыт!»

2026 сыл тохсунньу 6 күнүгэр саха норуодунай суруйааччыта Н.Е.Мординов-Амма Аччыгыйа төрөөбүтэ 120 сылын туолла. Тохсунньу 15 күнүгэр Платон Ойуунускай аатынан Литература музейыгар ахтыы дьоро киэһэтэ буолан ааста.

Манна сиэннэрэ, чугас аймахтара, суруйааччылар, биир дойдулаахтара кытыннылар. Истиҥ, сылаас эйгэлээх киэһэ буолла. Бэл диэтэр, Амма Аччыгыйын уонна Христофор Максимов «Учууталбар» ырыаларын күргүөмүнэн толордулар. Санатар буоллахха, быйыл бу хоһоон суруллубута 100 сылын туолар. Бу хоһоону Николай Егорович  20 эрэ саастаах сылдьан, 1926 сыллаахха суруйбут эбит.

«Бэлэм буол» хаһыат бэтэрээннэрэ сиэнигэр Никита Мординовка Амма Аччыгыйын 120 сылыгар анаан оҥоһуллубут мэтээли уонна  эмис куобаҕы бэлэхтээтилэр. Суруйааччы оҕонньоттор бииргэ бултуур, балыктыыр, бэйэ-бэйэлэригэр куһу, куобаҕы кэһиилэнэр үгэстээхтэрэ.

Амма Аччыгыйын сиэнэ, «Якутэнергосбыт» исписэлииһэ, полиграфист идэлээх  Никита Семенович Мординов санаатын үллэһиннэ:

— Эһэбит Николай Егорович төрөөбүтэ 120 сылын бэлиэтиир ахтыы дьоро киэһэтин «Бэлэм буол» хаһыат бэтэрээннэрэ, П. Ойуунускай аатынан Литература музейа, Саха сирин Суруйааччыларын сойуустара тэрийэн, наһаа үчүгэйдик ыыттылар. Эһэбит төрөөбүт-үөскээбит дойдутуттан, Тааттаттан, биир дойдулаахтара кэлэн кытыннылар. Кинилэр дойдуларыгар эмиэ Амма Аччыгыйын аатын үйэтитэр үлэни ыыталлар.

Онон тэрийээччилэргэ барыларыгар сиэннэрин, аймахтарын аатыттан улахан махталбытын тиэрдэбит. Олус үөрдүбүт.

Николай Егорович икки сиэннээх, түөрт хос сиэннээх. Маны тэҥэ, бииргэ төрөөбүттэрэ Авксентий Егорович, Трофим Егорович уонна Татьяна Егоровна оҕолоро, сиэннэрэ кэллилэр, — диэн кэпсээтэ.