ВИДЕО: Никита Никитин турааҕы иитэр

Аҕыйах хонуктааҕыта Никита кынатын кэбирэппит тураах обургу оҕотун булан, быыһаан киһи илиитигэр түргэнник үөрэппит.

Никита Никитин — Элгээйи оскуолатын 7 кылааһын үөрэнээччитэ, кини улааттаҕына орнитолог буолар баҕалаах. Кыратыттан араас көтөр саҥатын үтүктэр идэлээх. Кынаттаахтар да кинини кытта үөрэ-көтө кэпсэтэллэр, олус чугастык ылыналлар. Бу да тураах кинини күндүтүк санаан чугаһаатаҕа. Көтөр хаһаайынын илиититтэн ырааппат, Никита ытыһыттан күлүмэни ыйыста-ыйыста,  дааҕынаан элбэҕи кэпсиир.

Никита бу үһүс турааҕа, инникилэрэ көппүттэрэ, төрүт сирдэрин булбуттара. Эдэр орнитолог сөбүлүүр дьарыгын наукаҕа чинчийэн Бүтүн Россиятааҕы НПК-ҕа бэлэмнэнэр. Салайааччыта Сардана Герасимова — айылҕа түмэлин үлэһитэ үөрэнээччитин ураты оҕо, киниэхэ көтөрдөр дьиктитик сысталлар диэн санаатын үллэстэр.

Уолчаан улаатан куолаһа уларыйан сороҕу сатаабат буолбуппун диир эрээри уол кус саҥатын үгүһүн үтүктэн, куска илдьэ барыан баҕалаах элбэх.

Тураах барахсан Никитаны чугас табаарыс оҥостубут, сөҥ куолаһынан «даахтаан», бэлэсипиэтигэр олорсон аны дьиэлэрин диэки куйаара турдулар.

Тускулаана ГОРОХОВА-КОБЕЛЬЯНОВА