Николай Донской сыанаҕа төннүөҕэ

Социальнай ситимҥэ бэйэтин страницатыгар Николай Донской кэнсиэрин биллэриитин таһаарбытын көрөн баран, бастаан уруккуну таһаарбыт дии санаабытым. Ол эрээри санаам буолбакка Николайга сибээскэ тахсан кэпсэтэргэ быһаарынным. 90-cылларга киэҥник биллибит саха эстрадатын ырыаһыта, композитор Николай Донскойу кытта кэпсэтиибин билиһиннэрэбин.

— Уон сыл эттэххэ дөбөҥ. Бачча сыллар усталарыгар саха эстрадатыттан сүтэ сылдьан баран көрөөччүлэргин  соһутар буоллуҥ?  Сыанаҕа эргиллии санаата хайдах кэллэй?

— Чахчы, мин саха эстрадатын сыанатыттан сүппүтүм ыраатта. Ол эрээри айар үлэ онно тохтоон хаалбат буоллаҕа. Бу ааспыт олунньу ыйга доҕотторум Галина Гламур уонна Юрий Городецкай кэнсиэр тэрийиэххэ, сыанаҕа эргиллиэҥ этэ диэн үүйэ-хаайа туппуттара. Чахчыта, мин тугу да былааннаабакка сылдьыбытым. Хайдах эрэ эрдэ дии саныырым. Ол эрээри, доҕотторум миигин уһугуннардылар. Онон кинилэр этиилэрин ылынан, бу муус устар бастакы күнүгэр кэнсиэрдиир буоллум.

—Саҥа ханнык ырыаларынан үөрдэҕин? 

-Саҥа ырыалар бааллар эрээри бэлэмэ суохтар. Бу кэнсиэрбэр мин урукку ырыаларбын ыллаан бар дьоҥҥо ааспыт 90-c сыллары санатар, эдэр саастарын эргитэр санаалаахпын. Кэнсиэр айар үлэбин саҥаттан тыынныырбар көмөлөһүөҕэ дии саныыбын. Кэнсиэрим А.Е.Кулаковскай аатынан Норуоттар доҕордоһууларын дьиэтигэр буолуоҕа. Манна доҕотторум Олимпия, Евгений Прокопьев, Юрий Городецкай, Варя Максима, Лана Малагина, Петр Кулаковскай уонна Ирина Елизарова уола Рудольф Елизаров кыттыыны ылыахтара.