Николай Харбин: “Бэрт туһалаах пуорум буола турар”

Бу күннэргэ Дьокуускайга “Төрөөбүт дойду – Арассыыйа күүһэ” Бүтүн Арассыыйатааҕы III муниципальнай пуорум буола турар. Манна улуустар, куорат уокуруктарын баһылыктара көхтөөхтүк кытталлар. Тэрээһин туһунан Өлүөхүмэ улууһун баһалыга Николай Харбин санаатын үллэһиннэ.

— Дойду Бэрэсидьиэнэ В.В.Путин миэстэтигэр үлэлиир дьон туох кыһалҕалаахтарын, ыйытыылаахтарын истиэххэ диэн  болҕомтотун ууран, пуорум иитинэн Бүтүн Арассыыйатааҕы олохтоох бэйэни салайыныы ассоциациятын көһө сылдьар тэрээһинэ ыытыллар.  Муниципальнай таһымнаах үлэни тупсарар туһугар баһылыктар бүтүн Арассыыйа үрдүнэн бэйэ-бэйэлэрин кытта көрсөн, уопут атастаһан, чопчу боппуруостарга быһаарыыларын үллэстэллэр.

Сокуон сыллата тупсан, саҥардыллан иһэр. Бу олоххо киириитин нэһилиэнньэни кытта үлэлиир дьон  билэллэр. Манна санаа атастаһыытыгар бэрт тэрээһин буолла. Хас даҕаны сэргэх, туһалаах былаһаакка үлэлээтэ. Мин бэйэм улууспар ордук сыһыаннаах аныгы экэнэмиичэскэй усулуобуйа кэмигэр нэһилиэктэри сайыннарыы былаһааккатыгар сырыттым. Бу курдук былаһааккаларга хайысхаларынан федеральнай министиэристибэлэр кэлэн быһаччы сибээс үөскүүрэ улахан туһалаах.

Арассыыйа улахан, бүтүн 89 субъектаах, 14 тыһ. кэриҥэ муниципалитеттар баһылыктара үлэлииллэр. Проблема барыбытыгар даҕаны биир кэриэтэ. Онон атын эрэгийиэннэртэн биир идэлэхтэрбитин кытта билсиһэн уопут атастаһар, сүбэлэһэр, туһалаах тэрээһин буолла.