Николай Харлампьев: «Буойуттарбытын салгыы өйүүбүт!”

Бүлүү куоратын дьокутааттарын Сэбиэтин бэрэссэдээтэлэ, И.М.Гоголев-Кындыл аатынан Бүлүүтээҕи киин бибилэтиэкэ ситимин дириэктэрэ Николай Харлампьев байыаннай эпэрээссийэҕэ кытта сылдьар буойуттар дьиэ кэргэттэрин бас билиигэ түһэр нолуоктан босхолуур туһунан Бүлүү куоратын дьокутааттарын Сэбиэтэ быһаарыы ылыммытын туһунан кэпсээтэ.

— Бэс ыйын 26 күнүгэр Бүлүү куоратын муниципальнай тэриллиитин бэрэстэбиитэллээх уорганын дьокутааттарын Сэбиэтин сессията буолан ааста. Сессия көрүүтүгэр уопсайа алта боппуруос киирбитэ. Олортон саамай тирээн турар суолталааҕынан буойуттарбыт дьиэ кэргэттэрин өйүүр боппуруоһу көрүү буолар. Ил Дархан А.С.Николаев уурааҕынан бэйэни салайыныы уорганнарыгар барыларыгар байыаннай эпэрээссийэҕэ кытта сылдьар уолаттарбытыгар күүс-көмө буоларга рекомендация бэриллибитэ. Онон сиэттэрэн, биһиги байыаннай сулууспалаах дьиэ кэргэнин уонна кини төрөппүттэрин, ол аата икки ыалы тэҥинэн, бас билии баайга, сир учаастагар, олорор дьиэ нолуоктарыттан босхолуур туһунан быһаарыыны ылынныбыт. Мин санаабар, бу үчүгэй өйөбүл: уустук балаһыанньаҕа сылдьар дьону өйдөөн, биһиги дьокутааттарбыт биир санаанан сөптөөх өйөбүлү оҥордулар. Түүннэри, күнүстэри уолаттарын тустарыгар санааҕа-онооҕо сылдьар дьону нолуок кыһалҕатыттан босхолуур сөп. Өрөспүүбүлүкэбит муниципальнай тэриллиилэрэ байыаннай сулууспалаахтарбыт дьиэ кэргэттэригэр өйөбүл, тирэх буолар маннык нормативнай правовой быһаарыылары ылынан иһиэхтээхтэр.
Ийэ дойдуларыгар куттал суоһаабатын туһугар ытык иэстэрин толоро сылдьар дьоммутун биһиги хайаан да өйүөх тустаахпыт. Бу өттүгэр улуус, Бүлүү куоратын, бары нэһилиэктэр салалталара, дьон-сэргэ кырата суох кылааттарын киллэрсэ сылдьаллар.