Николай Харлампьев: «Туруоруммут сыалбытын ситиһиэхпит»

Бүлүү куоратын дьокутааттарын Сэбиэтин бэрэссэдээтэлэ, И.М.Гоголев-Кындыл аатынан Бүлүүтээҕи киин бибилэтиэкэ ситимин дириэктэрэ Николай Харлампьев Арассыыйа хас биирдии гражданина байыаннай эпэрээссийэҕэ ытык иэһин толоро байыастары өйөөһүҥҥэ бэйэтин кылаатын киллэриэх тустааҕын бэлиэтиир.

— Дойдубут үгүс олохтоохторун курдук, бас-көс национальнай лиидэрбитин, РФ Бэрэсидьиэнин Владимир Путины өйүүбүн. Эспиэр буолбатарбын даҕаны, мөлүйүөнүнэн дьон курдук, байыаннай эпэрээссийэ хаамыытын кэтээн көрөбүн. Генштаб салалтатын, аппыһыардар уонна саллааттар биир санааҕа түмсүүлээх уонна стратегия өттүнэн чочуллубут үлэлэрин түмүгэр, сотору кэминэн туруоруммут сыалбытын ситиһиэхпит диэн эрэнэбин.
Күн бүгүн Арассыыйа саллааттара, ол иһигэр биһиги биир дойдулаахтарбыт, Ийэ дойдуларын иннигэр ытык иэстэрин толоро сылдьаллар. Биһиги хас биирдиибит уолаттарбытын бары өттүнэн күүскэ өйүүр эбээһинэстээхпит. Ыччаттарбыт мантан туора турбаттар. Бүлүү улууһун волонтердара бу уопсай дьыалаҕа кырата суох кылааттарын киллэрсэ сылдьаллар.
Билиҥҥи кэмҥэ Арассыыйа эрэ буолбакка, бүтүн аан дойдуга баараҕай уларыйыылар бара турар кэмнэригэр олоробут. Ол түмүгэр, биһиги улуу дойдубут ити утары турар дойдулар соҥнуу сатыыр албын-түөкэй пропагандаларыттан тутулуга суох буоларын ситиһиэ! Кэлэктиибинэн куомуннаспыт арҕааҥы дойдулар биһиги Аҕа дойдубут чэчирии сайдарын утараллар. 50-с сыллартан ыла АХШ ССРС-ы, онтон салгыы РФ-ы утары охсуһуу стратегиятынан үлэлии олорор. Кини сыала – бырааттыы өрөспүүбүлүкэлэри мөлтөтөн, араартаан, өстөһүннэрии. Ити кэнсиэпсийэтигэр тирэнэн “арҕаалар” биһиэхэ алдьатыылаах култуурунай идеологическай үлэлэрин ыыталлар, ол ордук маассабай култуура эйгэтигэр күүскэ биллэр. Холобура, ону Голливуд сорох киинэлэригэр көрүөххэ сөп.

РФ Бэрэсидьиэнин быһаарыытын туох да саарбаҕа суох биһиги сөптөөҕүнэн ааҕабыт уонна өйүүбүт! Кырдьык биһиги өттүбүтүгэр!