Николай Кондаков аатынан судаарыстыбаннай бириэмийэ лауреата Ирина Гоголева кэлэктиибигэр махтанна

Бүгүн Араадьыйа күнүгэр Ил Дархан Айсен Николаев тэлэбиидэнньэ, араадьыйа уонна сибээс үлэһиттэрэ кырдьыктаах иһитиннэриини тиэрдиигэ сүрүн оруоллаахтарын анаан бэлиэтээтэ.

Аҕа баһылык суруналыыстар уопсастыбаннай санааны үөскэтэллэрин, дьон сомоҕолоһуутун биир тыынныылларын, кинилэр эппиэттээх үлэлэриттэн буола турар быһыы-майгы ылынылларын ыйда.

— Бүгүн 15-с төгүлүн Николай Кондаков аатынан бириэмийэни араадьыйа, тэлэбиидэнньэ уонна сибээс бэрэстэбиитэлигэр туттарабыт. Бу тэрээһин Улуу Кыайыы үбүлүөйүгэр туттарыллара икки бүк бэлиэ түгэн, — диэн бэлиэтээн туран, Ил Дархан Айсен Николаев “Саха” ГТРК дириэктэрэ Ирина Гоголеваҕа Сэбиэскэй Сойуус Дьоруойа, биллиилээх суруналыыс, Аҕа дойду Улуу сэриитин кыттыылааҕа Николай Алексеевич Кондаков аатынан судаарыстыбаннай бириэмийэни туттарда.

Хампаанньа дириэктэрэ, РФ Суруналыыстарын сойууһун чилиэнэ, СӨ “Гражданскай килбиэн” бэлиэ хаһаайына Ирина Гоголева бу суолталаах бириэмийэни өрөспүүбүлүкэ үтүө имиджин үөскэтиигэ уонна суруналыыстыка уобалаһыгар улахан кылааты киллэриигэ саамай элбэх уопсастыбаннай билиниини ылбыт таһаарыыларын иһин ылла.

2005 сыллаахха кулун тутар 14 күнүгэр “Арассыыйа” ханаалыгар аан бастаан “Вести Саха” иһитиннэрэр-биллэрэр ханаал федеральнай таһымҥа Саха сирин туһунан көрдөрбүтэ, кэпсээбитэ. Ол кэмтэн номнуо лоп курдук 20 сыл ааста. Бүгүҥҥү күҥҥэ «Россия 1» ханаалга “Вести Саха” сонуннарын биэриилэрэ икки тылынан күҥҥэ тоҕуста тахсар уонна “Вести Саха. Итоги недели” түмүк биэриилээх. Ону тэҥэ «Россия 24» ханаалга араас тиэмэлээх биэриилэри, быһа эпиирдэри уонна сонуннары таһаараллар. Хампаанньа бээтинсэ аайы «Сахам сирин сарсыардата» сахалыы тылынан биэрии быһа эпииргэ, нууччалыы тылынан сонуннары билиһиннэрэр “Местное время. Суббота” уонна сахалыы тылынан “Аһаҕас кэпсэтии” (субуотаҕа тахсар) анал тиэмэлэрдээх биэриилэрдээх. “Россия 24” күн аайы тахсар теле-ханаалга сонуннары, анал тиэмэлэрдээх биэриилэри (интервью, анал репортаж, быһа эпиир, ол иһигэр өрөспүүбүлүкэбит салайааччыларын кытта кэпсэтии, ааптарскай биэриилэр) тахсаллар. Суруналыыстар “Арассыыйа араадьыйата” («Радио России») ханаалга сахалыы, нууччалыы биэриилэри ыыталлар. Ирина Гоголева салайар иллээх кэлэктиип үлэлээбитин 20 сылын тухары араас айар куонкуруска кыттан ситиһиилэннэ. Ол эбэтэр 200‑тэн тахса араас наҕараадалаахтар. Саамай киэн тутталлара — 2010 сыллаахха «ТЭФИ-Регион» Бүтүн Арассыыйатааҕы тэлэбиидэнньэ куонкуруһугар информационнай биэрии номинациятыгар кыайыылааҕынан буолбуттара.

— Улуу Кыайыы үбүлүөйүгэр Николай Кондаков аатынан бириэмийэни ылар улахан чиэс. Суруналыыс сүрүн соруга – Аҕа дойду Улуу сэриитин туһунан историческай өйдөбүлү, кырдьыгы үйэтитии, анал байыаннай эпэрээссийэ дьоруойдарын туһунан сырдатыы. Патриотизм уонна көлүөнэлэр ситимнэрин туһунан дириҥ ис хоһоонноохтук кэпсиир  “Саха” ГТРК  кыахтаах кэлэктиибигэр махталым сүҥкэн. Бу бириэмийэ ГТРК  «Саха» үлэтин үрдүк сыанабыла, — диэн санаатын тиэртэ Ирина Гоголева.

Айар куттаах суруналыыс кэллиэгэбитин Ирина Гоголеваны дьоһуннаах наҕараадатынан истиҥник эҕэрдэлиибит!