Николай Парников: “Дьиэбит сылаас, итии уубут баар, уоппут быстыбакка кэлиэн баҕарабыт”

Дойду Бэрэсидьиэнэ Владимир Путин бүгүн пресс-кэмпириэнсийэ иитинэн ааһан эрэр сыл түмүгүн таһаарыаҕа. СӨ ОДьКХ уонна энэргиэтикэтин министиэристибэтин иһинэн уопсастыбаннай сэбиэт бэрэссэдээтэлэ, Арассыыйа уонна Саха сирин үтүөлээх энэргиэтигэ Николай Парников санаатын үллэһиннэ.

— Олох-дьаһах хомунаалынай хаһаайыстыбата – тыын боппуруос, биһиги бары онтон тутуллабыт. Дьиэбит куруук сылаас, итии, тымныы уубут куруук баар буолуон, уоппут-күөспүт быстыбакка кэлиэн баҕарабыт. Ол туһугар күүскэ үлэлиир ирдэнэр.

Нэһилиэнньэ уот сыанатын ыарырҕатар. Сотору реформа буолаары турар. Маныаха Саха сиригэр уот төлөбүрүн сыаната ыараабатыгар, нэһилиэнньэҕэ субсидия көрүллүөн баҕарабыт.

Дьиэ-уот өртүн ылан көрдөххө, манна элбэх ыйытыылар баалларын быһааран иһэллэр. Ол гынан баран, алдьаныы-кээһэнии тахсыбатын, сыана үрдээбэтин туһугар күн ахсын илиини араарбакка дьарыктанар ирдэнэр. Холоур, хапытаалынай өрөмүөн харчытын ый аайы төлүү олоробут. Ол харчы 30-50 сылынан эргийэн кэлиэ дииллэрин дьон итэҕэйбэт, тоҕо бу үбүн сыллааҕы өрөмүөҥҥэ туһанар кыаллыбат диэн ыйытыылар үөскүүллэр. Тустаах боппуруоһу сөптөөхтүк быһаарыы эрэйиллэр, — диэн санаатын этэр.