Николай Слепцов: «Саҥа оскуола тутуллан, оҕолорбут биир симиэнэнэн үөрэнэр кыахтаннылар»

Бүгүн Дьокуускай куорат П.Н. уонна Н.Е. Самсоновтар ааттарынан Хатас орто оскуолатын саҥа куорпуһа үөрүүлээх быһыыга-майгыга арылынна. Хатас сэлиэнньэтигэр тутуллан киирбит аныгы ирдэбилгэ толору эппиэттиир баараҕай тутуу, оҕо үөрэнэригэр, эбии дьарыктанарыгар кыаҕы биэриэ диэн оскуола дириэктэрэ Николай Слепцов санаатын үллэстэр:

— Биһиги оскуолабытыгар 1067 оҕо үөрэнэр. Оскуолабыт эбии куорпуһа кылгас кэм иһигэр тутуллан, бүгүн үөрүүлээх быһыыга-майгыга аһыллыбытыттан олус үөрэбит. Баччааҥҥа диэри оҕолорбут икки симиэнэнэн үөрэнэн кэллилэр. Аны оҕолорбут 5-тэн 11-с кылааска диэри биир симиэнэнэн үөрэнэр кыахтаннылар. Ону таһынан саҥа оскуолабыт аныгы ирдэбилгэ толору эппиэттиир. «Сэттэ» тутуу хампаанньатын кытары дизайн-бырайыагыттан саҕалаан, ханнык оборудованиены ыларбытыгар тиийэ, барытын уопсай сүбэнэн, бэйэбит баҕабытынан оҥордубут.

Эрдэ «Ориентир» тэрилтэтэ тутууну саҕалаан иһэн тохтообута. Ону, хата, саха уолаттара, «Сэттэ» тутуу хампаанньата кэлэн, аҕыс ый иһигэр тутан киллэрдэ. Айсен Николаев куорат баһылыгынан 2017 с. үлэлии сырыттаҕына бырайыакка уонна эспэртиисэҕэ үп көрүллэн, бу оскуола тутулунна. Онон Ил Дархаммытыгар Айсен Сергеевичкэ, өрөспүүбүлүкэ Бырабыыталыстыбатыгар, Үөрэх министиэристибэтигэр, Дьокуускай куорат дьаһалтатыгар, дьокутааттарыгар уонна «Сэттэ» хампаанньаҕа улахан махталбытын тиэрдэбит.