Николай Соболевка Арассыыйа Дьоруойун аата иҥэриллибитэ икки сыл буолла

Икки сыл анараа өттүгэр, 2024 сыл олунньу 15 күнүгэр, Арассыыйа Федерациятын Бэрэсидьиэнин Ыйааҕынан байыаннай иэһин толорууга көрдөрбүт хорсун уонна дьоруой быһыытын иһин гвардия майора Николай Сергеевич Соболевка «Кыһыл көмүс Сулус» мэтээл туттарыллан туран Арассыыйа Федерациятын Дьоруойун аата иҥэриллибитэ.

Николай Сергеевич Соболев 1996 сыллаахха тохсунньу 8 күнүгэр Амур уобалаһын Новобурейскай бөһүөлэгэр байыаннайдар дьиэ кэргэттэригэр төрөөбүтэ. Ийэтэ — мэдиссиинэ сулууспатын майора, аҕата — подполковник. Оҕо сааһа Амур уобалаһыгар, ЕАО-ҕа уонна Дьокуускайга байыаннай куораттарга ааспыта. Дьиэ кэргэн Саха сиригэр 2003 сыллаахха көһөн кэлбитэ. 2011 сыллаахха Николай Соболев Дьокуускайдааҕы 3-с нүөмэрдээх орто оскуоланы бүтэрбитэ. 2013 сыллаахха Сэбиэскэй Сойуус Маршала К.К. Рокоссовскай аатынан Уһук Илиннээҕи үрдүкү общевойсковой хамаандыырдар училищеларыгар үөрэххэ киирбитэ.

2017 сыллаахха үөрэҕин бүтэрэн баран, Воронеж уобалаһын Богучар куоратыгар — Арҕааҥҥы байыаннай уокурук 20-с гвардейскай аармыйатын 3-с мотострелковай Висленская дивизиятын 252-с гвардейскай мотострелковай полкатыгар анаммыта. Николай Соболев миномет взводун хамаандыырынан анаммыта, онтон тоҕус ый буолан баран рота хамаандыырын дуоһунаһын ылбыта. 2020 сыллаахха салалта кинини Москва биир университетыгар араб тылын тылбаасчытын кууруһугар ыыппыта. Арассыыйа Сирия Арабскай Өрөспүүбүлүкэтигэр норуоттар икки ардыларынааҕы террористартан көмүскүүр анал дьайыытыгар кыттыбыта.

2022 сыл сайыныгар Николай Соболев бэйэтин подразделениетын кытта Украинаҕа Арассыыйа Сэбилэниилээх күүстэрин байыаннай дьайыытын зонатыгар тиийбитэ. ВСУ утары кыргыһыыларга хорсун быһыытын көрдөрбүтэ. Бэйэтин мындыр өйүн уонна үрдүк бэлэмнээҕин иһин иккитэ «Эр санаа» уордьанынан уонна «Хорсунун иһин» мэтээлинэн наҕараадаламмыта. Арассыыйа Дьоруойа Николай Соболев Саха сирин Ил Дарханын каадырдары бэлэмнээһини сүрүннүүргэ көмөлөһөөччүтүнэн ананыаҕа.

«Байыаннай дьайыы кыттыылаахтарын байыаннай уопута, патриотизма, Ийэ дойдуга сулууспалааһыннара биһиги өрөспүүбүлүкэбитигэр саамай эппиэттээх уонна уустук учаастактарга наадалаах буолуохтаах диэн бүк эрэнэбин. Мин бу туһунан мэлдьи этэбин, биһиги манан утумнаахтык дьарыктанабыт. Ол иһин мин Николай Сергеевичка тус көмөлөһөөччүм буоларыгар этии киллэрдим», – диэн өрөспүүбүлүкэ Ил Дархана Айсен Николаев бэлиэтээтэ.

Санаттахха, Николай Соболев — «Дьоруойдар кэмнэрэ» Бэрэсидьиэн бырагырааматын кыттыылааҕа. Саха сиригэр Ил Дархан Айсен Николаев көҕүлээһининэн «Саха сирэ – Дьоруойдар дойдулара» үөрэх бырагыраамата олоххо киирэр. Бу бырагыраама байыаннай дьайыы кыттыылаахтарын идэлэрин уларытан бэлэмнээһиҥҥэ уонна социальнай адаптацияҕа, судаарыстыбаннай уонна корпоративнай секторга каадыр резервэтин тэрийиигэ туһуланар. Сиһилии: https://www.sakha.gov.ru/news/26267