Николай Спиридонов: “Бары бүттүүн күүс-көмө буола туруохпут”

Сунтаар улууһун Аллыҥа нэһилиэгин баһылыга Николай Спиридонов: “Байыаннай эпэрээссийэҕэ сылдьар уолаттарбытыгар уонна кинилэр дьиэ кэргэттэригэр дьоммут-сэргэбит, ыччаттар, оҕолор, бары бүттүүн күүс-көмө буола туруохпут”, — диэн Аллыҥаҕа бу хайысхаҕа үлэ барарын, дойдуга бэриниилээх буолууну болҕомто киинигэр туталларын тустарынан кэпсээтэ.

— Биһиги нэһилиэктэн элбэх уолаттарбыт бу байыаннай эпэрээссийэҕэ баран кытта сылдьаллар, бары этэҥҥэлэр. Сорохтор хантарааҕынан уонна баҕа өттүнэн баран, эргиллэн кэлбиттэрэ. Нэһилиэк олохтоохторо, төһө да бу уолаттарбыт араас сиргэ олорон, үлэлии сылдьаннар ити эпэрээссийэҕэ барбыттарын иһин, барыларыгар күүс-көмө буола олороллор.
Олохтоох дьаһалта иһинэн ылыллыбыт дьаһаллар быһыыларынан олохтоохтор, биһиги, байыаннай сулууспалаахтар дьиэ кэргэттэрин маһынан, мууһунан хааччыйыыга, атын да хаһаайыстыбаннай наадаларыгар көмөлөһөбүт. Ол курдук, биир дойдулаахтарбыт Николай Семенович уонча ыалга сылгы этэ итиэннэ Яна Степановна балык биэрэннэр, санааларын көтөхпүттэрэ. Нэһилиэкпит бүддьүөтүттэн отторун-мастарын тиэйтэрэллэригэр, хаһаайыстыбаларыгар туһаналларыгар диэн анаан, бу ыалларбытыгар 15-тии тыһыынча харчынан көмөнү тиксэрдибит. Тэрилтэлэринэн кыттыһаммыт байыаннай сулууспалаахтарбыт эпэрээссийэҕэ наадалаах тэрили, малы ылалларыгар үп-харчы хомуйан ыыппыппыт.
Олохтоох оскуолабыт бэйэтэ кыраайы үөрэтэр, кэпсиир түмэл курдук. Түмэл салайааччыта, кыраайы үөрэтээччибит Таисия Семеновна Иванова Аҕа дойду сэриитигэр кыттыбыт, ол кэмнэргэ үлэлээбит-хамнаабыт, олорбут дьоммут тустарынан элбэх баай матырыйаалы түмэн көрдөрүүгэ туруорар. Оҕолорбут ону мэлдьи көрө, үөрэтэ сылдьаллара хайҕаллаах. Манан сиэттэрэн оҕолорбут, нэһилиэнньэбит дойдуга бэриниилээх буолуу тыыныгар уһуйуллуулара бөҕөргүү турар.
Соторутааҕыта оскуолабыт иһинэн «Мин дьиэ кэргэним устуоруйата» диэн научнай-практическай кэмпириэнсийэни ыыттыбыт. Оҕолорбут Таисия Семеновна «Кэнчээригэ кэриэс буоллун» диэн кинигэтин туһананнар НПК кытыннылар. Төрүччү туһунан элбэх оҕо дакылаат бэлэмнээн кыттыбыта үчүгэй этэ. Бу тэрээһинтэн кинилэр эһэлэрэ-эбэлэрэ, хос эһэлэрэ Аҕа дойду Улуу сэриитигэр уонна тыылга кыттыыларын туһунан элбэҕи биллилэр-көрдүлэр. Инникитин маннык тэрээһиннэри оскуолабытыгар салгыы ыытан, өссө нэһилиэкпитигэр, улууспутугар кэҥэтэн улаатыннарыахпыт диэн былааннаахпыт.
Успуорка, култуураҕа, доруобуйа харыстабылыгар, онтон да атын өттүгэр нэһилиэкпит ситиһиилэрэ үчүгэй. Учууталларбыт, кулууппут, уһуйааммыт, ОДьКХ үлэһиттэрэ, нэһилиэк ыччата байыаннай сулууспалаахтарбытыгар көмөттөн ким да туора турбакка, күүс-көмө буола туралларыгар, улуус баһылыгар Анатолий Васильевичка, дьокутааппытыгар Ульяна Дмитриевнаҕа өйөбүллэригэр улахан махталбытын тиэрдэбин.
Биһиги бука бары уолаттарбыт этэҥҥэ кыайан-хотон кэлэллэригэр баҕарабыт, манна дьоммут-сэргэбит, ыччаттар, оҕолор кинилэргэ бары бүттүүн күүс-көмө буола туруохпут!