Николай Васильев туһунан кинигэ сүрэхтэннэ

“… Наһаа улахан киһи кэлэн ааста… Омуна суох, ууну-уоту ортотунан ааспыт салайааччыбыт киһиэхэ үчүгэйи эрэ оҥоро сылдьар үтүө хаачыстыбалааҕа”. “Кини — туох баар билиитин-көрүүтүн, баай уопутун дьон доруобуйатын араҥаччылыырга анаабыт үрүҥ халааттаах аанньал. Кинини дьон-сэргэ ытыктыыр, сүдү талааныгар сүгүрүйэр. Ылыннарыылаах тылын-өһүн, үтүө санаатын, тэрийэр дьоҕурун биир идэлээхтэрэ холобур оҥостоллор”…

Маннык тыллар Дьокуускай куорат өрөспүүбүлүкэтээҕи килиниичэскэй балыыһатын кылаабынай бырааһынан үлэлээбит, РФ уонна СӨ үтүөлээх бырааһа, мэдиссиинэ наукатын хандьытаата, Куорат Дууматын дьокутаата, Дьокуускай куорат, Ньурба оройуонун уонна Ньурба улууһун 1 Кангаласс нэһилиэгин бочуоттаах гражданина Николай Николаевич Васильевка анаммыттар.
Ахсынньы 9 күнүгэр Дьокуускай куорат Перинатальнай киинигэр “Николай Николаевич Васильев” кинигэ сүрэхтэннэ.
Кэрэ-бэлиэ, эмиэ да курус тыыннаах түгэҥҥэ Николай Васильевич биир идэлээхтэрэ халыҥ хамаанданан хомуллан кэлбиттэрэ көрөргө олус долгутуулаах. Ону сэргэ, өрөспүүбүлүкэ салайааччылара, уопсастыбанньыктар, орто оскуолаҕа уонна үрдүк үөрэх кыһатыгар бииргэ үөрэммиттэр, доҕотторо, аймахтара уо.д.а. кэллилэр.

Кинигэ сүрэхтэниитин Дьокуускай куорат килиниичэскэй балыыһатын кылаабынай бырааһа, Куорат Дууматын дьокутаата Алена Никитина салайда.

Дьокуускай куорат Дууматын бэрэссэдээтэлэ Альберт Семенов: “Николай Николаевич киһи эрэ сөҕүөн курдук барытын сатаан дьүөрэлиирэ. Кини, бастатан туран, талан ылбыт быраас идэтигэр бэриниилээҕэ. Күндүтүк саныыр киһибит бар дьонун туһугар үлэтэ-хамнаһа – биһиэхэ барыбытыгар үтүө холобур”, — диэн кинигэ күн сирин көрбүтүнэн эҕэрдэлээтэ.
Николай Васильев туһунан кинигэ тахсыытын кини улахан убайа, СӨ үтүөлээх юриһа, СӨ бочуоттаах бэтэрээнэ, ССРС ИДьМ бочуоттаах бэтэрээнэ Василий Васильев, Дьокуускай куорат Дууматын дьокутааттара (Евдокия Евсикова), үгүс сылларга кылаабынай бырааһынан үлэлээбит балыыһатын кэлэктиибэ көҕүлээн таһаардылар. Кинилэргэ Альберт Семенов Куорат Дууматын бэрэссэдээтэлин Махталын уонна СӨ доруобуйа харыстабылын миниистирин солбуйааччы Дмитрий Сергин министиэристибэ Махтал суруктарын үөрүүлээх быһыыга-майгыга туттардылар.
Балыыһа бочуоттаах бэтэрээннэрэ, биир идэлээхтэрэ, бииргэ алтыспыт дьонноро Николай Николаевич Киһи киһитэ буоларын бэлиэтээн туран, идэҕэ бэриниилээх быраас, дьокутаат быһыытынан ахтан-санаан аастылар.

х х х

“Саха киэн туттар дьоно” сериянан тахсыбыт кинигэ Саха Өрөспүүбүлүкэтин Ил Дархана Айсен Николаев “Милосердие и чуткость к чужой боли, воля к спасению людей всегда была для него главным ориентиром и в работе, и в жизни” диэн ахтыытыттан саҕаланар. Айсен Николаев Айыылартан ананан кэлбит быраас уонна салайааччы туһунан ахтыытын “Николай Николаевич туһунан сырдык өйдөбүл мин сүрэхпэр куруук баар буолуоҕа”, — диэн түмүктээбит.
Өрөспүүбүлүкэ салайааччылара Ольга Балабкина, Евгения Михайлова, Альберт Семенов, Евгений Григорьев уо.д.а. истиҥ иһирэх ахтыылары оҥорбуттар. Николай Васильев оскуолаҕа бииргэ үөрэммит оҕолоруттан саҕалаан, күн сириттэн күрэниэр диэри бииргэ алтыспыт дьоно үтүө доҕордорун туһунан киһи билбэт элбэх түгэннэрин, киһи аайы бэриллибэт үтүө хаачыстыбаларын, балыыһаны салайыаҕыттан үлэлээн кэлбит хомолтолоох да, үөрүүлээх да түгэннэрин ааҕааччыга киэҥник сырдаппыттара кэрэхсэбиллээх уонна махталлаах.