Хаартыска: Дьулустаан Сергеев, ЯСИА
«Модун» успуорт уораҕайыгар Ноговицыннар бириистэригэр хапсаҕайга өрөспүүбүлүкэтээҕи турнир түмүктэннэ.
Күрэхтэһии устата алта ыйааһын категориятыгар бастыҥнар быһаарылыннылар диэн ЯСИА иһитиннэрэр. Күрэхтэһиигэ Саха сирин улуустарыттан, ону таһынан Арассыыйа хас да эрэгийиэниттэн 230-ча тустуук кытынна.
Турнир «А» кылаастаах, онон кыайыылаахтар уонна призердар хапсаҕайга успуорт маастара буолар кыахтаахтар. Саамай чэпчэки ыйааһыҥҥа Үөһээ Дьааҥы улууһуттан Егор Находкин бигэ туруктааҕын көрдөрөн, эмиэ кыһыл көмүс мэтээли ылла. Иккис миэстэҕэ Нам улууһуттан Сахаачча Винокуров таҕыста. Оттон АГАТУ-тан Вячеслав Ноговицын боруонса мэтээлинэн бэлиэтэннэ. Мэтээл иһин саамай элбэх киһи 65 киилэҕэ диэри ыйааһыҥҥа кииристэ — 73 тустуук. Кинилэртэн бастыҥнарынан Үөһээ Бүлүү улууһуттан Зафарбек Одинаев буолла. Финалга кини «Тургэн» успуорт кулуубун бөҕөһө Азамат Егоровы кыайда. Үһүс миэстэни Хаҥалас улууһуттан Родион Васильев ылла.
Үөһээ Бүлүүттэн Тимур Николаев 75 киилэҕэ диэри ыйааһыҥҥа үһүс сылын субуруччу кыайыылааҕынан таҕыста. Ону таһынан, кини муҥутуур чөмпүйүөн аатын сүктэ. Финалга кини сүрүн утарсааччытын, Кэбээйи улууһуттан Иван Семеновы, көрсүстэ. Сунтаар улууһуттан Кирилл Павлов боруонса призер буолла. 85 киилэҕэ диэри ыйааһыҥҥа көҥүл тустууктар финалга таҕыстылар. Кыһыл көмүс мэтээл иһин киирсиигэ Бүлүү улууһуттан Ньургустан Брощев Тааттаттан сылдьар Албан Аввакумовы кыайда. Чурапчыттан Ньургустаан Иванов пьедестал үһүс үктэлигэр таҕыста. Таатта улууһуттан Александр Халыев (95 киилэҕэ диэри) бэртээхэй тустууну көрдөрдө. Бүтэһик киирсиигэ кини түөрт успуорт көрүҥэр успуорт маастарын, «Дыгын оонньууларын» кыттыылааҕын, Ньурба улууһуттан Владимир Федоровы кыайда.
Дьулус Попов Үөһээ Дьааҥы улууһугар боруонсаны аҕалла. Оттон муҥутуур ыарахан ыйааһыннаахтарга Саха сирин муҥутуур чөмпүйүөнэ, Нам улууһуттан Эдуард Максимов, бастыҥын дакаастаата. Финалга киниэхэ Сунтаартан Айсен Килибеев хоттордо, оттон чурапчыттан сылдьар Виталий Ефремов үһүс буолла.
Санатабыт, Ноговицыннар турнирдара ХХ-с төгүлүн ыытылынна. Бу тэрээһин Дьааҥы улууһа төрүттэммитэ 95 сылыгар уонна Аҕа дойду Улуу сэриитигэр Кыайыы 80 сылыгар ананан ыытылынна.
Тохсунньу 9 күнүгэр Уус Алдан улууһугар Мүрүгэ "Түһүлгэ" киин балаҕан-дьиэтигэр Саха Өрөспүүбүлүкэтин Суруйааччыларын сойууһун чилиэнэ,…
Доруобай буолуу төрдө. Тыыныынан эмтэнии биир саамай былыргы ньымата -- хатха-йога. Биһиги кэммитигэр биир сиргэ…
Күн-дьыл билгэтин төһө билэҕитий? Бу туһунан И.М.Сосин "Күн-дьыл билгэтэ" кинигэтигэр сиһилии суруллар. Тымныы кыһын буоларыгар:…
Дьааҥы улууһун Арыылаах орто оскуолатын саха тылын, литэрэтиирэтин учуутала, РФ уопсай үөрэхтээһинин туйгуна Петр Слепцов…
Ахсынньыга Дьокуускайга оҕолорго уонна ыччаттарга I өрөспүүбүлүкэтээҕи төрүт култуураҕа чөмпүйэнээт буолан ааспыта. Төрүт сахалыы эйгэни…
Сахалар билгэлэрэ Сахалар итэҕэллэринэн киэһэ таһырдьа улаханнык саҥарыа, айдаарыа суохтааххын, сир иччитин кыыһырдыаххын сөп. Түүн…