Нолуок туһунан ыйытыыларга хоруйдууллар

Федеральнай нолуок сулууспатын Саха сиринээҕи управлениетын салайааччытын солбуйааччы Владислав Скрябин биирдиилээн дьон нолуокка сыһыаннаах ыйытыыларыгар хоруйдаата.

Ыйытыы: Нолуок төлөбүрүгэр ханнык чэпчэтиилэр баалларый?

Хоруй: Өрөспүүбүлүкэҕэ нолуокка чэпчэтиинэн туһанар дьон ахсаана сыллата элбии турар. Ол курдук, 41 тыһ. тахса киһиэхэ тырааныспарка, 126 тыһ. киһиэхэ сиргэ, 171,5 тыһ. киһиэхэ баайга-дуолга нолуокка чэпчэтии оҥоһуллубута.

Саха сиригэр былырыыҥҥыттан тырааныспар нолуогар көрүллэр чэпчэтиилэргэ эбии, РФ аҕыйах ахсааннаах төрүт норуоттара олорор сирдэригэр бэлиэтэммит (регистрацияламмыт) уонна төрүт хаһаайыстыбанан дьарыктанар дьоҥҥо, бойобуой дьайыы бэтэрээннэригэр уонна биирдиилээн дьоҥҥо нолуокка чэпчэтии көрүллэр.

Үс уонна үстэн элбэх сокуоннай сааһын туола илик  оҕолоох дьоҥҥо сир, баай-дуол нолуогар чэпчэтии, нолуогу төлөөччү талыытынан биир тырааныспары (кыра массыына, матассыыкыл, мотороллер, автобус, таһаҕас тиэйэр массыына) нолуоктан босхолууллар.

Ыйытыы: Сокуоннай сааһын туола илик оҕобор нолуоккун төлөө диэн иһитиннэрии сурук кэлбит? Оҕолор нолуок төлүүллэр дуо?

Хоруй: Өскөтүн оҕо кыбартыыраҕа эбэтэр чааһынай дьиэҕэ өлүүлээх түгэнигэр, кини нолуогу төлөөччү ахсааныгар киирсэр. Бу нолуогу оҕо оннугар төрөппүт тус кэбиниэтинэн, мобильнай сыһыарыынан төлүөн сөп.

Ыйытыы: Нолуок төлөбүрүн туһунан  иһитиннэрэр суругу (уведомление) хантан ылыахха сөбүй?

Хоруй: Нолуок төлөбүрүн туһунан иһитиннэрэр сурук (уведомление) биирдиилээн нолуогу төлүүр дьон тус кэбиниэттэригэр барар. Өскөтүн бу киһи тустаах сервискэ бэлиэтэммэтэх түгэнигэр,  нолуок төлөбүрүн иһитиннэриитин (уведомление) буочта нөҥүө ыыталлар.

Өскөтүн нолуок туһунан иһитиннэрэр суругу (уведомление) туппатах буоллаххытына, Нолуок уорганын тэрилтэтин операционнай саалатыгар тиийэн ылыаххытын сөп. Манна даҕатан эттэххэ, 100 солк. кыра суумаҕа нолуок туһунан иһитиннэрэр сурук кэлбэт. Үс сыл ааспытын кэннэ көрүллэр.

Ыйытыы: Киирбит нолуок төлөбүрэ ханна барарый?

Хоруй: Тырааныспар нолуога олоччу өрөспүүбүлүкэ бүддьүөтүгэр, биирдиилээн дьон баайга-дуолга нолуога ханна баарыттан тутулуктанан олохтоох бэйэни салайыныы (нэһилиэк, куорат) бүддьүөтүгэр, сир нолуога эмиэ онно киирэр.

Ыйытыы: Массыынаҕа гаас холботторбут дьоҥҥо чэпчэтии баар диэн истибитим. Ол хайдах үлэлиир?

Хоруй: Тырааныспар нолуогар массыыналарыгар гаас тэрилин холбоппут дьоҥҥо чэпчэтии улахан суолталаах. Манна 50% чэпчэтии көрүллэр. Гаас тэрили холботон баран ГИБДД уорганыгар булгуччу бэлиэтэтэр ирдэнэр.

Ыйытыы: Нолуокпун хайдах төлүүбүн?

Хоруй: Нолуогу баан нөҥүө эбэтэр баан мобильнай сыһыарыытын көмөтүнэн, баан суох түгэнигэр олохтоох дьаһалта кассатыгар эбэтэр почтанан төлүөххэ сөп. Налоги ФЛ мобильнай сыһыарыынан төлүүр табыгастаах.

Хоруйдары сиһилии бу ыйыллыбыт сигэнэн киирэн көрүөххтүтүн сөп.

Хаартыска: СИАтан.