Нордголд Саха сиригэр саҥа бырайыагы олоххо киллэриэҕэ

Илиҥҥи экэниэмикэ пуорумун чэрчитинэн, Саха Өрөспүүбүлүкэтигэр “Сардаана” сибиньиэс уонна цинк хостуур сири баһылааһыҥҥа инвестиция бырайыагын олоххо киллэриигэ туһуламмыт түөрт өрүттээх сөбүлэҥҥэ илии баттанна.  

Докумуоҥҥа РФ Уһук Илини уонна Арктиканы сайыннарыыга миниистирэ Алексей Чекунков, СӨ Баһылыга Айсен Николаев, Уһук Илини уонна Арктиканы сайыннарыы корпорациятын (FEACDC) генеральнай дириэктэрэ Николай Запрягаев уонна «Норголд» генеральнай дириэктэрэ Георгий Смирнов илии баттаатылар.

“Саха сирэ – Уһук Илин экэнэмиичэскэй өрүтүнэн эрчимнээхтик сайдар эрэгийиэннэриттэн биирдэстэрэ. “Сардаана” сир баайын хостуур сири сайыннарыы өрөспүүбүлүкэ экэниэмикэтин сайдыытыгар саҥа сүүрээнинэн буолуон сөп. Судаарыстыба өйөбүлүн көмөтүнэн өссө биир бырамыысыланнас кластера үөскүөҕэ. Саҥа инвестиционнай бырайыак Соҕуруу Саха сиригэр аныгы тэрилтэни тутууну саҕалыаҕа, үрдүк таһымнаах саҥа үлэ миэстэлэрэ тэриллиэхтэрэ”,— диэн бэлиэтээтэ Арассыыйа премьер-миниистирин солбуйааччыта – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, Илиҥҥи экэнэмиичэскэй пуорум тэрийэр кэмитиэтин бэрэссэдээтэлэ Юрий Трутнев.

Уус Маайа улууһугар саҥа бырамыысыланнас сайдыытыгар оруоллаах кэмбинээти тутуу бырайыагар инвестиция 30 млрд солк. кэриҥэ курдук буолуоҕа. Манна сүүһүнэн үлэ миэстэтэ тахсыаҕа. Арассыыйа Уһук Илини уонна Арктиканы сайыннарыыга миниистирэ Алексей Чекунков: «Сардаана” сир баайын хостуур сири сайыннарыы Арассыыйа сиртэн хостонор баайын кыаҕын бөҕөргөтөрүн ааһан,  оройуон сайдыытын тэтимирдиэҕэ«, — диэн эттэ.

СӨ Баһылыга Айсен Николаев: «Бу бырайыагы олоххо киллэрии Уус Маайа оройуонун уонна өрөспүүбүлүкэ социальнай-экэнэмиичэскэй сайдыыларыгар улахан суолталаах. Ол аата — үлэ миэстэтэ, инфраструктура сайдыыта уонна бүддьүөккэ эбии нолуок дохуота киириитэ», — диэн бэлиэтээтэ.

Сиһилии: https://www.sakha.gov.ru/news/11226 сигэнэн ааҕыҥ.