Норуодунай артыыска Прасковья Адамова олохтон туораата

Олунньу 16 күнүгэр Саха Өрөспүүбүлүкэтин норуодунай артыыската Прасковья Павловна Адамова уһун ыарахан ыарыыттан олохтон туораабытын Саха тыйаатырын кэлэктиибэ иһитиннэрэр.

Прасковья Павловна Адамова-Күн Чүүйэ 1945 сыллаахха бэс ыйын 9 күнүгэр Мэҥэ Хаҥалас оройуонун Майа сэлиэнньэтигэр күн сирин көрбүтэ.

1966 сыллаахха М.С. Щепкин аатынан үрдүкү театральнай училищены бүтэрэн, тыйаатыр уонна киинэ артыыһын идэтин ылбыта. 1966-1977 сылларга Ньурбатааҕы судаарыстыбаннай көһө сылдьар драма тыйаатырыгар артыысканан, 1970-1977 сылларга Майатааҕы норуодунай тыйаатыр режиссерунан, 1980 сылтан олоҕун тиһэх күнүгэр диэри Былатыан Ойуунускай аатынан Саха академическай тыйаатырыгар драма артыыскатынан үлэлээбитэ.

Сүрүн оруоллара: Филимошка – «Тиэриллибит кырыс» М.Шолохов (1966), Сибэкки көрөөччү – «Бэтиэхэлээх кыыс» Лопе де Вега (1966), Поля – «Баанньык» В.Маяковскай (1966), Күннэй – «Күкүр Уус» С.Омоллоон (1967), Наташа – «Иирбит Ньукуус» П. Ойунского (1967), Наталья – «Чуумпу Дон» М.Шолохов (1980), Елена Ивановна – «Эһэ» А.Чехов, Ньургу – «Сайсары» С.Омоллоон, Аксинья – «Аммаҕа саас этэ» Баһылай Харысхал (1981), Валентина – «Хапсыһыы» Е.Неймохов (1982), Мадина – «Сатыы Махмуд» М.Карим (1983), дьахтар – «Ханидуо уонна Халерхаа» С. Курилов (1985), Миссис Коуэн – «Көҥүл итии күнэ» С.Омоллоон (1986), госпожа Александра – «Ороһуоспа киэһэ» С.Омоллоон (1996), Даарыйа Сыгаева – «Сааскы кэм» Амма Аччыгыйа (2003), Маайа – «Көмүстээх кылаат» И.Дмитриев-Сиэн Чолбодук (2004), Дьукаах – «Власть тьмы» (2006), Эһэ — «Сэмэнтэй уонна Пэлэм-Пэлэм» Г.Курилов остуоруйатыгар (2014), «Уһуктуу» Софья Баранова абсурд (2015), Надежда – «Кэнчээри-1966» trash-испэктээкил (2015), Госпожа — «Кээрэкээн» П.Ойуунускай (2018), Балбаа — «Ыраахтааҕы ыйааҕа» П.Ойуунускай (2018) уо.д.а.

Прасковья Павловна кэргэнигэр Савва Алексеевичка, оҕолоругар, сиэннэригэр уонна чугас дьонугар дириҥ кутурҕаммытын тиэрдэбит, аһыыгытын тэҥҥэ үллэстэбит.

2020 сыллаахха «Саха сирэ» хаһыакка бэчээттэммит интервьюну ааҕыҥ.