Аныгы сайдыылаах үйэбитигэр өрөспүүбүлүкэбит хайа да муннугар аны хаалыылаах, түҥкэтэх сир диэн суох.
Бээ, бу ыраах, сир халлаанныын ыпсыылаһар сиригэр көҕөрүмтүйэн көстөр хайалартан тардыыланан, будулуйа-бидилийэ уста сытар, кыһыннары-сайыннары быстыбат дүлүҥ саҕа балыктаах үрэҕи сыттана сытар Түҥкэтэхтээҕи аатыгар холоон түҥкэтэх сир диэмэҥ. Манна аныгы үйэ түргэн сибээһин ооҕуй оҕуһун ситимэ – сыыппара, уопта- болохуна диэтэххэ, ол да барыта баар. Санныларыттан сааларын араарбат сылгыһыттар, бостууктар, булчуттар түҥ тайҕа да быыһыттан сиэптэриттэн сымарпуоннарын таһааран күнү супту сэлэһэллэр. Дьэ, сүрдээх диэтэҕиҥ. Киһи сымыйаргыан курдук.
Аҕыйах күн хонуктаабыт ыалым аҕа баһылыктара, мөлбөөрүччү уойбут ойоҕун үөннээҕинэн тэһитэ көрүтэлиир, кымаахтаһан ыла-ыла саһыгыраһар ситэн эрэр кыргыттарын кынчыаттыы, күөйэн түгэх диэки кыһарыйталыы сылдьар дьиэ хаһаайына Түмэппий Сахаарабыс үһүс кылаас үөрэнээччитэ уолчаанын ноутбукка “сэриилэһэн” тиритэ-хорута олордоҕуна, үнтү бардьыгынаан дьиэтээҕи үлэтин толорторооччу буолла. Ахсаан суоттаан айдааны тартылар, ытаһан да ыллылар.
– Иккигэ иккини эптэххэ хаһый?
– Икки…
– Көр, бу, биир 5 солкуобай. Бу иккис 5 солкуобай. Холбоон хас буоларый?
– Икки…
– Поо-суол, баллаас! — Түмэппий Сахаарабыс кыйаханан, онто суох уу-хаар баһан, ытыырга бэлэмнэнэн олорор уолчаанын чанчыгыттан тардан сарылатта.
– Оттон, икки 5 солкуобайдаахтар буолбат дуо, ыы-ыы…
– Сахаҥ тылыгар биэрбит сорудахтарын толордуҥ дуо?
– Ээ, толорбоппун хайаабаппын. Күүскүтүнэн үөрэтэр быраапкыт суох . Ыы-ыы… – Сахаарчык ытаан сыҥсырыйа олордо.
Түмэппий Сахаарабыс тылыттан матан, мах бэрдэрэн тура түһэн баран, ыстаанын кэтит курун устубутунан барда. “Аҕаа, ааттыыбыан, ыы-ыы…” — Сахаарчык аймана хаалла, мин маннык “норуодунай педагогиканы” тулуйбакка, уолчааны аһына-аһына таһырдьа атахха биллэрдим…
Ахсынньы 7 күнүгэр Оһуокай куоракка олорор Бүлүү улууһун олохтоохторугар ананна. Куоракка олорор Бүлүү улууһуттан төрүттээх…
Дьүөгэм, Үп министерствотыгар таһаарыылаахтык үлэлээбит Анна Романовна Винокурова бочуоттаах сынньалаҥҥа олорор. Бу күннэргэ Дубайга олорор…
Уһун, тымныы кыһыннаах, тыйыс айылҕалаах хоту дойдуга олорор буоланнар, өбүгэлэрбит барахсаттар күөх сайын уунар уйгутуттан…
Амма улууһун Соморсун нэһилиэгэр үлэһит тырахтарыыс уолаттар, эр дьон баар буоланнар, дэриэбинэ олоҕо күөстүү оргуйар.…
"Амма" эрэгийиэннээҕи айан суолун 93-94 км учаастагар билигин да күөлтэн уу киирэ турар. "СУ-77" тэрилтэ…
Маннык тэттик сүбэлэри тутустаххына, настарыанньалаах, үөрэ-көтө сылдьыаҥ, кыраттан иҥнэн-бохтон туруоҥ суоҕа. Сэниэлээх, күүстээх-уохтаах буолуоҥ. -бэйэҕин…