Норуодунай суруйааччы Егор Неймохов мемориальнай дуоскатыгар сибэкки дьөрбөтүн уурдулар

Бүгүн, кулун тутар 30 күнүгэр, Саха сирин норуодунай суруйааччыта, Саха  Өрөспүүбүлүкэтин Суруйааччыларын сойууһун бэрэссэдээтэлинэн үлэлээбит Егор Петрович Неймохов төрөөбүтэ 75 сылын туолар.

Бу күн кини төрөөбүт-үөскээбит дойдутугар Томпо улууһун Мэҥэ Алданыгар үбүлүөйдээх тэрээһиннэр саҕаланнылар.
Онтон Дьокуускай куоракка Егор Неймохов олорбут, айбыт-туппут Кальвица уулуссатын 9/1 дьиэтигэр мемориальнай дуоскаҕа сибэкки дьөрбөтүн уурдулар, суруйааччы туһунан истиҥник-иһирэхтик ахтан санаан аастылар.

Тэрээһини СӨ Суруйааччыларын сойууһа көҕүлээн ыытта. Тэрээһиҥҥэ СӨ Суруйааччыларын сойууһун чилиэннэрэ, суруйааччылар, Егор Неймохов  бииргэ алтыспыт чугас  дьоно, биир дойдулаахтара кэлбиттэр. Эҕэрдэ тылы «Полярная звезда» сурунаал эрэдээктэрэ Владислав Доллонов, филология наукатын дуоктара Гаврил Филиппов, СӨ норуодунай суруйааччыта Наталья Михалева-Сайа, кыраайы үөрэтээччи Николай Николаев, Мэҥэ Алдаҥҥа ыкса ыала Клара Туласынова эҕэрдэлэрин тириэртилэр.

Владислав Доллонов:
-Егор Петрович миигин СӨ Суруйааччыларын сойууһун уонна сойуус бырабылыанньатын чилиэнинэн ылбытынан  киэн туттабын. Университеты саҥа бүтэрбит эдэркээн киһи Саха сиринээҕи кинигэ издательствотыгар үлэҕэ ылыллан, Егор Неймохов «Көтүү», «Хапсыһыы» курдук айымньыларын корректуратын ааҕаммын, бастакы  ааҕааччы буолбуппунан эмиэ  олус киэн туттабын.
Егор Петрович обком идеологияҕа отделыгар үлэлээн, «Айсберг» диэн сурунаалы саҥалыы тыыннаан, урукку өттүгэр хаһан да тахсыбатах айымньылары, докумуоннары бэчээттээн, саха норуотун устуоруйатыгар улахан кылаатын киллэрбитэ. Ол курдук, кини — Алексей Кулаковскай-Өксөкүлээх Өлөксөй «Саха интеллигенциятыгар» суругун «Айсберг» сурунаалга бэчээттээн, киэҥ ааҕааччыга аан бастаан таһаарбыт уопсастыбаннай диэйэтэл. Онон кини иэмэ-дьаама биллибэт кэмҥэ хорсун быһыыны оҥорон турар, -– диэн бүгүн мустубут дьоҥҥо СӨ Суруйааччыларын сойууһун аатыттан махталын биллэрдэ уонна Егор Петрович аатын куруук өрө тутарга, кини үтүө аата үйэлэргэ умнуллубатыгар бары күүспүтүн түмэн үлэлииргэ ыҥырда.

Наталья Михалева-Сайа:
-… Егор Петрович 60 сааһын бэлиэтээн элбэх да айаҥҥа, көрсүһүүлэргэ сылдьыбыппыт. Ол үлэ түмүгэр 2010 с.  «Олох бүппэт хапсыһыы» диэн икки сиэрийэлээх документальнай киинэ оҥоһуллан тахсыбыта. Бу иннинэ саха тэлэбидиэнньэтигэр документальнай киинэлэр хаһан да сиэрийэлэммэт этилэр. Онтон мин наһаа элбэҕи устан кэбиһэммин, Егор Петрович туһунан элбэх докумуоннары, ахтыылары киллэрэммин, олус баай устуу буолбута. «Бырастыы гыныҥ, Өксөкүлээх Өлөксөйгө, Былатыан Ойуунускайга иккилии сиэрийэ анана илик» диэбиттэрин үрдүнэн туруулаһан-туруулаһан икки сиэрийэлээх документальнай киинэ буолан тахсыбыта. Егор Петрович: «Мин санаабын сөпкө өйдөөбүккүн, табан көрдөрбүккүн» диэн долгуйбутун биллэрбитигэр уонна миэхэ итэҕэйэн киинэ устарга сөбүлэспитигэр бэйэм олус долгуйан турабын.
Мин дьоллоохпун -– Моисей Ефимов, Егор Неймохов курдук наһаа үрдүк култууралаах, айар дьоҕурдара чыпчаал таһымҥа турар, сиэр-майгы өттүнэн наһаа ыраас, кэрэ дьон аттыларыгар сылдьаммын, литэрэтиирэ эйгэтигэр кэлбиппинэн, элбэх айар доҕоттордоммуппунан. Кинилэр суруйааччы быһыытынан эппит-тыыммыт тыллара-өстөрө. чугас доҕордуу да быһыытынан арыт такайан, арыт сүбэлээн, арыт сөҕөн,  хайҕаан да кэлбит кэмнэрэ миэхэ мэлдьи сүрэхпэр бааллар.

Мария Петровна уонна Егор Петрович Неймоховтар кыра уоллара Михаил Неймохов:
«Мин аҕам чугас дьоно, биир идэлээхтэрэ, биирдэ-иккитэ да алтыһан ааспыт дьоно аҕабынан киэн тутталларын туһунан этэллэриттэн, өйдүү-саныы сылдьалларыттан олус үөрэбин», -– диэн бүгүҥҥү тэрээһиҥҥэ кэлбит, ахтан-санаан ааспыт дьоҥҥо махталын биллэрдэ.

Быһаарыы:

Егор НЕЙМОХОВ -– СӨ норуодунай суруйааччыта, СӨ култууратын үтүөлээх үлэһитэ, П.Ойуунускай аатынан Судаарыстыбаннай бириэмийэ уонна Саха сирин хомсомуолун лауреата, Томпо улууһун Бочуоттаах гражданина, 1991 сылтан СӨ Суруйааччыларын сойууһун чилиэнэ, 2009–2011 сылларга СӨ Суруйааччыарын сойууһун бэрэссэдээтэлэ.

Егор НЕЙМОХОВ олоҕун, айар үлэтин кэпсиир 2010 с. уһуллүбүт 2 сиэрийэлээх документальнай киинэ бүгүн «Саха» НКиХ ютуб-ханаалыгар  киирдэ. Киинэ ааптара -Наталья Михалева-Сайа,  режиссер Саймон Сергеев.