«Норуодунай суруйааччылар төрөппүттэрэ Бүөтүстээх Маарыйа» ахтыы-кинигэ биһирэмэ буолла

Саха сирин норуодунай суруйааччылара, РСФСР Максим Горькай аатынан бэриэмийэ лауреаттара Сэмэн, Соппуруон Даниловтар күндү төрөппүттэригэр Мария Яковлевна, Петр Яковлевич Даниловтар холобур буолар дьоһун олохторугар анаммыт «Норуодунай суруйааччылар төрөппүттэрэ Бүөтүстээх Маарыйа» ахтыы-кинигэ биһирэм күнэ үрдүк таһымҥа буолан ааста.

 

Саха саарыннара буолбут Сэмэн, Соппуруон Даниловтар үөрэнэ, үтүө дьон кэккэтигэр киирэллэрин туһугар, олохторун сырдык кэмнэрин анаабыт Мария Яковлевна, Петр Яковлевич Даниловтар ааттара көмүс буукубаларынан саха норуотун историятыгар суруллар, үгүс үйэлэргэ ааттана туруохтарыгар көмүс бэлиэ буолар кинигэни РФ Суруналыыстарын сойууһун чилиэнэ, СӨ суруналыыстарын «Кыһыл көмүс бөрүө» лауреата, Горнай улууһун Бочуоттаах олохтооҕо Василий Ильич Алексеев, физико-математическай билим хандьыдаата, ХИФУ доцена, РФ үрдүкү профессиональнай үөрэҕириитин Бочуоттаах үлэһитэ, Учууталлар учууталлара, Кэбээйи улууһун, I, II Лүүчүн нэһилиэктэрин Бочуоттаах олохтооҕо Марк Петрович Григорьев хомуйан оҥордулар.

СӨ култууратын туйгуна, Горнай улууһун Бочуоттаах олохтооҕо, кииннэммит библиотечнай ситим сүрүн библиограба Анастасия Ивановна Заровняева кинигэ кылгас библиографическай билиһиннэриитин оҥордо.

Сыл-хонук аастаҕын аайы олорон ааспыт аҕа саастаах көлүөнэ дьону көрбүт, алтыһан да ааспыт дьон аҕыйаан иһэллэр. Көлүөнэни көлүөнэ солбуйар, олох сокуона оннук буоллаҕа. Ол иһин сурукка түһэрэн, кинигэ оҥорон таһаарыы суолтата үрдүк. РФ Бэрэсидьиэнэ Владимир Путин биллэрбит «Дьиэ кэргэн сыла» дойдубут эрэгийиэннэригэр олорор Арассыыйа хас биирдии дьиэ кэргэнин олоҕо тупсарыгар туһаайыллыбыта. Сыл устата өрөспүүбүлүкэбитигэр, улууспутугар, нэһилиэктэргэ, тэрилтэлэргэ бу сылга анаммыт үтүө дьаһаллар, тэрээһиннэр тиһиктээхтик ыытылыннылар. Дьиэ кэргэттэргэ улахан болҕомто уурулунна.

Бу кэрэ бэлиэ сылга үйэ аҥара бииргэ олорбут киэн туттар, ытык-мааны дьиэ кэргэттэри – Бэрдьигэстээх нэһилиэгиттэн Раиса Алексеевна, Петр Иннокентьевич Гороховтары, Одуну нэһилиэгиттэн Анна Николаевна, Николай Прокопьевич Федоровтары Горнай улууһун баһылыгын бастакы солбуйааччыта, Дьиэ кэргэн сылыгар улууспутугар ыытыллар дьаһаллар салайааччылара Сардаана Степановна Стручкова эҕэрдэлээтэ, “Горнай улууһа” муниципальнай оройуон баһылыгын дьаһалынан олохтоммут уу харчынан сэртипикээттэри туттарда.

Мария Павлова, бибилэтиэкэр.

Бэрдьигэстээх, Горнай.

Ааптар хаартыскаларга түһэриитэ