Норуокка чугас суут 25 сыла

2000 сыл ыам ыйын 3 күнүгэр “СӨ мировой сууттарын туһунан” өрөспүүбүлүкэтээҕи сокуон ылыллыбыта. Бу гражданскай дьыалалары көрүүгэ олох атын, норуокка чугас суут систиэмэтэ буолар.

Мировой юстиция Саха сиригэр олохтонуоҕуттан, хас улуус аайы мировой сууттар баар буолбуттара. Кинилэр боростуой гражданскай дьыалалары, ыстарааптары, аҕыйах чэпчэки категориялаах холуобунай дьыалалары көрөллөр. Ол курдук Саха сиригэр 63 сууттуур учаастак баар, холобур Дьокуускайга 13 итинник учаастак үлэлиир. Улахан оройуоннарга Мииринэйгэ, Нерюнгрига биэстии, Алдаҥҥа, Ленскэйгэ үстүү, атын улуустарга биирдии учаастак баар, баларга 212 киһи үлэлиир. Мировой юстиция сылтан сыл аайы ноҕурууската улаатан иһэр, ол курдук  билигин дьон бэйэлэрин бырааптарын туруорсаллар, бырааптара кэһиллибит буоллаҕына суукка дьыала түһэрэллэр, госуорганнарга сайабылыанньа биэрэллэр.

Ыам ыйын 6 күнүгэр 1 №-дээх бырабыыталыстыба дьиэтин Өрөспүүбүлүкэ саалатыгар бу сокуону олоххо киллэрбит дьону үйэ аҥардаах үбүлүөйдэринэн чиэстээһин буолла. Үөрүүлээх тэрээһиҥҥэ СӨ Бырабыыталыстыбатын бэрэссэдээтэлэ Кирилл Бычков, СӨ Үрдүкү Суутун бэрэссэдээтэлэ Любовь Летучих, бырабыыталыстыба бэрэссэдээтэлин солбуйааччы Ольга Балабкина, мировой юстиция бэтэрээннэрэ, судьуйалар, аппараат үлэһиттэрэ, о.д.а. кыттыыны ыллылар.

“Өрөспүүбүлүкэ мировой судьуйалара күннэтэ сокуон харабылыгар тураллар, кинилэр киһилии быһаарыыларынан үгүс иирсээннэр сөпкө көрүллэн этэҥҥэ түмүктэнэллэр. Ураты махталбын мировой юстиция бэтэрээннэригэр тиэрдэбин, чуолаан эһиги туруктаах олугу уурбуккут, сыаната биллибэт уопуккутун саҥа көлүөнэ юристарга, аппараат үлэһиттэригэр биэрбиккит. Баай уопукка тирэнэн, саха сирин мировой юстицията тэтимнээхтик сайда, дьон сокуоннай быраабын көмүскүүр эрэллээх мэктиэ буола туруо”, —  диэн туран Кирилл Бычков Ил Дархан, СӨ Бырабыыталыстыбатын аатыттан наҕараадалары туттарда.