Бу күннэргэ Өрөспүүбүлүкэ күнүн көрсө В.Г. Белинскэй аатынан кыраайы үөрэтэр бибилэтиэкэҕэ биир олус кэрэхсэбиллээх тэрээһин буолан ааста.
«Чороон кистэлэҥ сипсиэрэ» диэн дьикти ураты ааттаах үгүс ааҕааччыны түмпүт тэрээһин туһунан бибилэтиэкэр Екатерина Попова бу курдук билиһиннэрдэ:
— «Куорат олохтооҕо» («Горожанин») диэн кулууп ыытар үлэтин чэрчитинэн Дьокуускай куорат олохтоохторун сөбүлүүр дьарыктарын, тугу сөбүлээн мунньалларын, кинилэр ис дууһалара баайын көрдөрөр быыстапкалары тэрийэр бырайыагы толкуйдаабытым. Быйыл ол үлэм бастакы хараҥаччытынан СӨ норуодунай артыыһа, РФ уонна СӨ үтүөлээх артыыһа Дмитрий Артемьев муспут чорооннорун кэллиэксийэтэ буолла.
В.Г. Белинскэй аатынан бибилэтиэкэни өр сылларга салайбыт Калькарина Карадчина тэрээһин кыттыылаахтарын эҕэрдэлээтэ.
Быыстапка, үгэс быһыытынан, кыһыл лиэнтэни быһыынан саҕаланна.
Норуот артыыһа Дмитрий Артемьев чорооннору оҕо эрдэҕиттэн мунньан саҕалаабыт эбит. 7-с кылааска сылдьан, ампаартан эргэ чороону булан ылан, ыраастаан, лаахтаан баран күн бүгүҥҥэ диэри тутта сылдьар эбит. Кэлин билбитэ, ол чороон «Алгыс чорооно» дэнэр эбит уонна алгыска туттуллар эбит. «Арааһа, миигин Үрдүкү Айыылар оҕо эрдэхпиттэн «Алгыһы түстээ» диэн анаан ыйан суолбун арыйбыттар эбит» диэн бэлиэтиир Дмитрий Артемьев. Кини бастакы быыстапкатын туһунан маннык кэпсээтэ:
«Чороон кистэлэҥ сипсиэрэ» диэн тэрээһин, аата да этэринии, кырдьык да, дириҥ кистэлэҥи илдьэ сылдьар ис хоһоонноох чорооннор эбит. Ол курдук, быыстапка дьоруойа араас сылларга араас сирдэртэн аҕалбыт чорооннорун ураты кистэлэҥнэрин арыйда. Онтон түмүктээтэххэ, хас биирдии чороон дойду устуоруйатын кэпсииргэ дылылар эбит. Холобура, Сэбиэскэй кэмҥэ аатырбыт Ригатааҕы фарфор оҥоһуктары оҥорор собуот тутаахтаах чорооно үгүс ыалдьыт болҕомтотун тарта.
Аны хурустаал чороону ылан көрүөх. Бу эмиэ сэдэх чороон буоллаҕа.
Кырачаан бэйэлээх чорооннор эмиэ кынтаһан, бэйэлэрин миэстэлэрин бу быыстапкаҕа булбуттар.
Киһи хараҕа халтарыйар үрүҥ көмүс чороон, килбэйэн, дьэ, кини эрэ!
Саамай былыргы саха чороонун Дмитрий Артемьевка Эбээн Бытантайтан бэлэхтээбиттэр.
Былыргы чорооннору чөлүгэр түһэрэн саҥардар (реставрация) сэдэх исписэлиис,норуот маастара Василий Протопопов доҕоругар, РФ уонна СӨ үтүөлээх артыыһа Дмитрий Артемьевка хас да былыргы чороону бэлэх ууммут. Кини бу дьикти үлэтин туһунан киһи истэ олоруохтуу кэпсээтэ.
Биллэн турар, араас бэлэх чороон үгүс эбит. Ол онтон хаһы да артыыс аҕалан быыстапкаҕа туруорбут.
«Көмүлүөк» хампаанньа Дмитрий Артемьев бэйэтин мөссүөнүн чорооҥҥо ойуулаан бэлэхтээбит.
Кырдьык да, түҥ ыраах үйэттэн саҕалаан, күн бүгүнүгэр диэри чороон кистэлэҥ сипсиэрин истэн, тэрээһин кыттыылаахтара олус улахан дуоһуйууну ыллыбыт, билиибит-көрүүбүт кэҥээтэ. Тэрээһиҥҥэ норуот маастара Василий Протопопов-Сиэн Уус олус интэриэһинэй түгэннэри кэпсээн, виртуоз-хомусчут Артур Семенов-Тоҥ Саха хомуска оонньоон, төрөөбүт сахатын тылын өрө туппут бибилэтиэкэр Хаарчаана Семенова кырыымпаҕа оонньоон уонна олоҥхолоон, «Чороон кистэлэҥ сипсиэрин» олох ураты сахалыы тыыннаатылар, олус киэргэттилэр.
Дириҥ ис хоһоонноох бырайыак ааптара, бибилэтиэкэр Екатерина Попова бу маннык ураты дьарыктаах куорат дьонун билиһиннэрэр тэрээһиннэргэ ааҕааччылар өссө да кэлэн кыттыыны ылалларыгар ыҥырда.
«Чороон кистэлэҥ сипсиэрэ» быыстапка В.Г. Белинскэй аатынан кыраайы үөрэтэр бибилэтиэкэ кыраайы үөрэтэр салаатыгар ыам ыйыгар диэри үлэлиэҕэ.
Киһи үксэ түүн тугу түһээбитин уһуктаат быһаара, тойоннуу, билэ көрө сатыыр. Оттон сорохтор түүлү мээнэ…
Бэйэбитин көрүнүөҕүҥ, доруобуйабытыгар туһалааҕы оҥостуоҕуҥ. Ытыстары бэйэ-бэйэлэригэр аалан сылытыллар уонна сырдык киирбэтин курдук тарбахтары бэйэ-бэйэлэригэр…
Ол курдук, сэтинньи 4 күнүгэр, национальнай киин аанын тэлэччи аһыаҕа. Бу күн "Создавая будущее" норуоттар…
Арҕааҥҥылары Зеленскэй эҥин араастык сордоон-муҥнаан сэриигэ кыттыһыннара сатыыр. https://t.me/sakhasire20/46123
Соторутааҕыта Таатта улууһун Чычымах сэлиэнньэтигэр ититэр ситим тыраассатын саҥардан оҥоруу киин ититэр ситими саҥардыыга ситиһиилээх…
Бэчээттиир станок айыллыбыта үйэ аҥаара ааспытын кэннэ, 1501 сыллаахха Гутенберг кырасыабай курсива айыллыбыт. Аан бастаан…