“Норуот бэйэтин култууратыгар тирэҕирэр буоллаҕына, кини туохтан да кыайтарбат, туох баар ыарахаттары туоруур”

Сергей Местников, СӨ Бырабыыталыстыбатын Бэрэссэдээтэлин солбуйааччыта:

-Ил Дархан Туһаайан этиитигэр бырамыысыланнаска, экэниэмикэҕэ, тыа хаһаайыстыбатыгар ылыллыбыт сүрүн ситиһиилэргэ тохтоото. Бу ситиһиилэр билиҥҥи, судуругута суох кэмҥэ, оннук биллэр-көстөр курдук буолбатахтар гынан баран биһиги өрөспүүбүлүкэбит дьонун олоҕор үчүгэй өттүнэн дьайаллар.

Ил Дархан 2026 сылы Саха Өрөспүүбүлүкэтигэр Култуура сылынан биллэрдэ. Биһиги өрөспүүбүлүкэбит чахчы да култууратын, үгэстэрин, сиэрин-туомун, төрөөбүт тылларын арааһа элбэҕинэн баай. Манна элбэх норуот иллээх-эйэлээх олоҕунан олорор, кинилэр сомоҕолоһууларын сүрүн тосхолунан култуура буолар, норуоттар үгэс буолбут култууралара, аныгы култуура, ускуустуба, духуобунай сайдыы. Ол да курдук дойдубут бэрэсидьиэнэ Владимир Путин соторутааҕыта оҥорбут пресс-кэмпэриэнсийэтигэр Саха сиригэр олус талааннаах дьон олороллор, үлэлииллэр диэн бэлиэтээбитэ. Оттон биһиги култуурабыт өссө сайда турарын туһугар туох баар усулуобуйаны оҥоруохпут.

Айсен Сергеевич бэлиэтээн эппитин курдук, билиҥҥи кэмҥэ сомоҕолоһуу, чэгиэн өй-санаа, халбаҥнаабат быһыы-майгы туохтааҕар да наада. Бу үс бириинсип саамай сүрүн тирэхтэринэн култуура буолар. Норуот бэйэтин култууратыгар тирэҕирэр буоллаҕына, кини туохтан да кыайтарбат, туох баар ыарахаттары туоруур.