Норуот билгэтэ: Сылаас алтынньы – тымныы кыһын

Норуот билгэтинэн алтынньыга халлаан туруга хайдах буоларыттан кыһын, саас уонна сайын хайдах күүтүллэрэ сылыктанар.

Алтынньы ыйа — күһүн иккис ыйа. Бу ыйы норуокка араастык билгэлииллэр. Күн кылгыыр, салгына сөрүүдүйэр. Холобур, «Алтынньыга эбиэккэ диэри күһүн, эбиэт кэннэ кыһын», — диэн норуокка мээнэҕэ этиллибэт. Бу ыйы кэтээн көрөн, кэлэр ыйдарга күн-дьыл туруга хайдах буоларын билгэлииллэр.

• ­Сылаас алтынньы — тымныы кыһын.
• Күүстээх, уһун тымныылар турдахтарына – ордук тыйыс тымныы кыһын буолар.
• Алтынньыга этиҥ эттэҕинэ — хаара суох, кылгас уонна сымнаҕас кыһын буолара күүтүллэр.
• Ый саҥатыгар илиҥтэн тыалырдаҕына — сөҥүүтэ суох ыйдар туруохтара, арҕааттан тыал түстэҕинэ – элбэх сөҥүү түһэр, хотуттан тыалырдаҕына – тыйыс тымныы кыһын буолар.
• Алтынньыга ханнык чыыһылаттан тымныы түһэриттэн муус устар ыйга бу чыыһылаттан сылаас күннэр саҕаланыахтара.
• Алтынньыга ханнык чыыһылаҕа хаар түстэҕинэ, ол күнтэн саас муус устар ыйга сылыйан барар.