Норуот чулуу уолугар сүгүрүйэн

Дьокуускайга «Россия- мин историям» история пааркатыгар уһулуччулаах бэлитиичэскэй, уопсастыбаннай уонна судаарыстыбаннай диэйэтэл, Саха Өрөспүүбүлүкэтин төрүттээччилэртэн биирдэстэрэ И.Н.Барахов төрөөбүтэ 125 сылыгар аналлаах мультимедийнэй быыстапканы үөрүүлээхтик арыйыы буолла.

Мустубут дьону бу улахан тэрилтэ дириэктэрин солбуйааччы М.А.Дьячковская кэрэ-бэлиэ түгэнинэн эҕэрдэлээтэ, быыстапканы арыйда. Тэрээһиҥҥэ култуура кэллиэһин преподавателэ М.Г.Боппоёнова салалтатынан, төрүт култуура салаатын устудьуоннарын бөлөҕө ытык бэйиэттэр И.Гоголев, В.Сивцев уонна И.Ороһуунускай И.Н.Бараховка анаабыт хоһооннорун аахпыттара, истибит эрэ долгуйар дьүһүйүүлэрэ буолан ураты тыын уган, мустубут дьону биир сүдү энергетикаҕа киллэрэн, тэрээһин суолтатын арыйар күүс буолла. Үөһээ Бүлүү улууһун куораттааҕы бэрэстэбиитэлэ А.Б.Иванов улууканнаах биир дойдулаахпыт сырдык аатын үйэтитиигэ бу быыстапка өссө биир улахан суолталаах тэрээһин буоларын бэлиэтээн туран, улууспут салалтатын аатыттан эҕэрдэтин тириэртэ. Оттон мин Исидор Никифорович саха норуотун кэскилин, бүгүҥҥүтүн туһугар олоҕун да кэрэйбэтэх хорсун быһыытын — 1922 с. кулун тутар 10- гар оҥорбут былааһы уларыппыт, норуот дьылҕатын быһаарбыт хоодуот быһаарыныытын туһунан кэпсээтим.

Экскурсияны В.Борисов ыытта. Быыстапкаҕа кэлбит ХИФУ историяҕа факультетын устудьуоннара сэҥээрэн иһиттилэр, сорохтор бэлиэтэнэн истилэр. Биһиги музейбыт сотруднига Е.П.Семенова И.Бараховка анаыбыт сырдатар, биллэрэр-көрдөрөр сыаллаах оонньуутун мустубут дьону хамаандаларга арааран оонньоппутун, сүрдээҕин сэҥээрдилэр. Түмүккэ кыттааччылар өйдөбүнньүк бириистэринэн наҕараадаланнылар.

Быыстапканы тэрийэрбитигэр история пааркатын экскурсияны тэрийиигэ исписэлииһэ, историк С.П.Жайлаубаева уоппускаҕа сылдьарын аахсыбакка ылсан үлэстэ. Оттон быыстапкалыыр отделы салайар Е.А.Газизов уонна исписэлиис М.Чоросов биһиги музейбыт пуондатыттан докумуоннары, хаартыскалары электроннай варианнарын ыыппыппытын аныгы технологиянан аттаран, бэттээхэй быыстапканы оҥорон, дьон-сэргэ көрүүтүгэр таһаардылар. Бу быыстапка И.Н.Бараховы үйэтитиигэ биир улахан ситиһиибит буолар. Музейбыт кэлэктиибин аатыттан тэрийсибит дьоммутугар С.П.Жайлаубаеваҕа, Е.А.Газизовка, М.Чоросовка, култуура кэллиэһин преподаватэлэ М.Г.Боппоеноваҕа, устудьуоннарга бары үтүөнү баҕарабыт, махтанабыт.

Светлана Копыленко,

И.Н.Барахов аатынан СӨ судаарыстыбаннаһын музейын салайааччыта.