Норуот дьокутаата уокуругун олохтоохторун мэдиссиинэ аныгы тэрилинэн өйөөтө

Ил Түмэн дьокутаата  Гаврил Алексеев Өймөкөөн уонна Орто Халыма улуустарын ыраах сытар  фельдшерскай-амбулаторнай пууннарыгар аныгы мэдиссиинэ тэриллэрин бэлэхтээтэ.
Бу туһунан норуот дьокутаатын көмөлөһөөччүтэ Виктория Контоева иһитиннэрдэ: «Орто Халыма улууһун Арҕахтаах, Өлөөкө-Күөл, Сыбаатай нэһилиэктэрин олохтоохторо төрөөбүт дойдуларыттан ыраата барбакка, сүрэхтэрин анал аппараакка көрдөрөр, бэрэбиэркэлэтэр кыахтаннылар.

Оттон Тымныы полюһа Өймөкөөн улууһун Аартык бөһүөлэгин фельдшерскай пуунун дьокутаат тус бэйэтинэн өйөөн, пульсоксиметрдары,  ⁠  фармацевтическай холодильнигы, матараастаах функциональнай орону, ростомеры, кыһыл оҕо ыйааһынын ыытта.

Маны таһынан, мэдиссиинэ үлэһиттэрин көмпүүтэрдэринэн уонна принтердэринэн хааччыйда».