Норуот дьокутааттара быыбардааччыларын иннилэригэр отчуоттаатылар

Бэҕэһээ Ил Түмэн дьокутааттара Алексей Еремеев уонна Александр Атласов Нам улууһун нэһилиэктэригэр сылдьан, олохтоохтору кытары көрсөн, үлэлэрин отчуоттаатылар.

Түмүктүүр мунньах Нам нэһилиэгэр Култуура дыбарыаһыгар ыытылынна диэн Нам улууһун дьаһалтатын пресс-сулууспата иһитиннэрэр.

Норуот дьокутааттара хас биирдии нэһилиэккэ дьон-сэргэ туруорсубут ыйытыыларын, этиилэрин истэн, салгыы ханнык суоллары тобулан үлэлиир туһунан кэпсэттилэр. Нам улууһугар тутуу үлэтэ балысханнык барарын, ону сэргэ дьон олоҕун уйгута тупсарыгар үлэ-хамнас ыытылларын тоһоҕолоон эттилэр. Инникитин быһаарыллыахтаах долгутар боппуруостар былааннаах үлэ ыытылыннаҕына олоххо киириэхтэрин торумнаатылар.

Тэрээһин түмүктүүр чааһыгар үлэлэригэр үрдүк ситиһиилээх, биир дойдулаахтарын чиэстээтилэр. Ол курдук, Ил Түмэн Бэрэссэдээтэлин Махтал суругун улуус Бэтэрээннэрин сэбиэтин бэрэссэдээтэлигэр Софья Кобяковаҕа, Ил Түмэн наука уонна үөрэх сис кэмитиэтин Бочуоттаах грамотатын Нам 2-с №-дээх орто оскуолатын алын кылааһын учууталыгар Саргылаана Тарскаяҕа уонна Нам 1-кы №-дээх орто оскуолатын гигиеническэй иитиигэ инструктора Лена Обутоваҕа туттардылар