Норуот дьокутааттара илиинэн оҥорон таһаарааччылары өйүүр сокуону ылыннылар

Ил Түмэн уочараттаах пленарнай мунньаҕар «Саха Өрөспүүбүлүкэтин аччыгый уонна орто урбаан сайдыытын туһунан» СӨ 6-с уонна 38-с №-дээх ыстатыйатыгар уларытыылары уонна эбиилэри киллэрии туһунан» сокуон барыла көрүлүннэ.

Сокуон барылын норуот дьокутааттара Афанасий Владимиров уонна Алексей Корнилов көҕүлээн оҥордулар. Сокуон барылыгар аччыгый уонна орто урбааны өйүүргэ Саха Өрөспүүбүлүкэтин Бырабыыталыстыбатын боломуочуйата чуолкайданна уонна судаарыстыбаннай былаас итиэннэ олохтоох салайыныы уорганнарын өттүттэн илиинэн оҥорооччулары, уһанааччылары өйүүр көмө испииһэгэ ыйыллыбыт.

Дьоҕус уонна орто урбаан субъектарын өйүүр инфраструктура тэрилтэлэрин, ол иһигэр илиинэн оҥоруу, уһаныы кииннэрин уонна кинилэр үлэлэрин хааччыйыыга, үбүнэн, сүбэнэн-аманан, иһитиннэриинэн өйөбүлү оҥорууга көмө оҥоһуллуон сөп, ол туһунан барылга эмиэ суруллубут.

Манна бэлиэтээн эттэххэ, илиинэн оҥорон таһаарыы диэн өйдөбүлэ эмиэ быһаарылынна. Онно табаары бэйэ илиитинэн оҥорон таһаарыы, үлэни уонна өҥөнү оҥоруу эбэтэр таҥаһы-сабы, атах таҥаһын, маһынан уонна тимиринэн уһаныы, ону тэҥэ бытовой өҥөнү оҥоруу киирэр диэн суруллубут.

Сокуон бырайыагын дьүүллэһии түмүгүнэн норуот дьокутааттара сокуону иккис ааҕыыга бүтэһиктээхтик ылыннылар.